23.07.2026 | 18:28
Վահան Կոստանյանը Փարիզում քննարկել է Հայաստանի համար եվրոպական շուկայի հասանելիության ընդլայնումը
Բաքուն և Թեհրանը ռազմական համագործակցության, տարածաշրջանային անվտանգության հարցեր են քննարկել
Քաղաքականություն
06.12.2023 | 20:51
Ադրբեջանի պաշտպանության նախարար Զաքիր Հասանովն ընդունել է այցով Բաքվում գտնվող Իրանի ռազմածովային ուժերի հրամանատար, կոնտր-ծովակալ Շահրամ Իրանիին։ Ադրբեջանի ՊՆ-ի հաղորդմամբ՝ կողմերը քննարկել են ռազմական ոլորտում համագործակցության զարգացումը։
«Հանդիպման ընթացքում նախարարն ընդգծել է փոխայցելությունների կարևորությունը ռազմական ոլորտում համագործակցության հետագա զարգացման տեսանկյունից»,- ասվում է հաղորդագրության մեջ։
Ըստ ադրբեջանական կողմի՝ Իրանին իր հերթին շնորհավորել է Հասանովին «Ադրբեջանի ինքնիշխանության ու տարածքային ամբողջականության վերականգնման», ինչպես նաև երկրի զինված ուժերի ձեռքբերումների կապակցությամբ։ Նա նաև վստահություն է հայտնել, որ նման հանդիպումները դրական ներդրում կունենան երկկողմ ռազմական համագործակցության հարցում։
«Հանդիպման ընթացքում մտքերի հանգամանալից փոխանակում է տեղի ունեցել ռազմական համագործակցության զարգացման հեռանկարների, տարածաշրջանային անվտանգության հարցերի և այլ թեմաների շուրջ»,- նշում է Ադրբեջանի ռազմական գերատեսչությունը։
Էմմա Չոբանյան
