08.04.2026 | 01:11
Խարբերդի ամառանոցներից դեպի Նուբարաշեն ավտոճանապարհին 5 մեքենա է բախվել. 3 անձ հոսպիտալացվել է
Բայրամովը հայտարարել է, որ «Ադրբեջանը կողմ է Հայաստանի հետ սահմանազատման բանակցությունների ակտիվացմանը երկկողմ հիմքով»
Քաղաքականություն
05.12.2023 | 17:43
Մոսկվայում այսօր Ադրբեջանի ԱԳ նախարար Ջեյհուն Բայրամովի և ՌԴ ԱԳ նախարար Սերգեյ Լավրովի միջև տեղի ունեցած հանդիպման հետ կապված ադրբեջանական արտաքին քաղաքական գերատեսչությունն իր հաղորդագրությունն է տարածել։ Նշվում է, որ հանդիպման ընթացքում քննարկվել են Ադրբեջանի և Ռուսաստանի միջև համագործակցության հարցեր, ինչպես նաև Ադրբեջանի և Հայաստանի միջև հարաբերությունների կարգավորման գործընթացի ներկա իրավիճակը և հեռանկարները։
Ըստ ադրբեջանական կողմի հաղորդագրության՝ կողմերը քննարկել են նաև երկկողմ օրակարգի մի շարք ուղղություններ, այդ թվում՝ քաղաքական, առևտրատնտեսական, հումանիտար, կրթական և մշակութային ոլորտներում համագործակցության զարգացման հեռանկարները։ Գոհունակություն է արտահայտվել Ադրբեջանի և Ռուսաստանի միջև բազմակողմ համագործակցային հարաբերությունների մակարդակից։
Բայրամովը նաև նշել է, որ Ադրբեջանը շահագրգիռ կողմ է տարածաշրջանում խաղաղության և կայունության հաստատման հարցում։ Նա հավելել է, որ Բաքուն աջակցում է Ադրբեջանի և Հայաստանի միջև սահմանի սահմանազատման շուրջ բանակցությունների ակտիվացմանը՝ երկկողմ հիմքով։
Հավելենք, որ Ադրբեջանի ԱԳՆ ղեկավարը Մոսկվայում մասնակցել է մերձկասպյան երկրների՝ Իրանի, Ղազախստանի, Ռուսաստանի և Թուրքմենստանի ԱԳ նախարարների հանդիպմանը։
Էմմա Չոբանյան
