Ադրբեջանում ձերբակալել են ոստիկանության ապօրինությունները բացահայտած ակտիվիստին

Ադրբեջանում ձերբակալվել է ակտիվիստ, իրավապաշտպան, նախկին ոստիկան Իլհամիզ Գուլիևը։ Ադրբեջանական լրատվամիջոցներին հարազատները պատմել են, որ նրան ձերբակալել են քաղաքացիական հագուստով անձինք, քաշքշելով ու ծեծելով տարել։

Գուլևի դեմ քրեական գործ է հարուցվել։ Փաստաբան Զիբեյդա Սադիգովայի խոսքով՝ նա մեղադրվում է ՔՕ 234.1 հոդվածով (թմրամիջոցների ապօրինի շրջանառություն)։ Գուլիևին սպառնում է մինչև 3 տարի ժամկետով ազատազրկում։

Ավելի վաղ՝ հոկտեմբերին, Իլհամիզ Գուլիևը ձերբակալվել էր 30 օրով՝ «մանր խուլիգանության» և «ոստիկանությանը չենթարկվելու» մեղադրանքով։ Դա տեղի էր ունեցել այն բանից հետո, երբ նա հարցազրույց էր տվել «Abzas Media»-ին՝ պատմելով այն մասին, թե ինչպես է ոստիկանությունը «չփաստաթղթավորված թմրանյութերն օգտագործում քաղաքական ձերբակալություններում»:

Իրավապաշտպան Ռուֆաթ Սաֆարովի խոսքով՝ չնայած այն բանին, որ Գուլիևի ձայնը հարցազրույցում փոխվել է հատուկ ծրագրով, ՆԳՆ փորձագետները պարզել են նրա ինքնությունը։ Գուլիևն իմացել է, որ իրեն կեղծ մեղադրանքով ձերբակալելու են, և նախօրոք թմրանյութերի փորձաքննություն է անցել՝ հաստատմամբ, որ թմրանյութ չի օգտագործում։

Սաֆարովը նաև նշել է, որ վերջին երկու տարիներին ԱՄՆ Միջազգային զարգացման գործակալության ծրագրի շրջանակում Գուլիևն իրավական օգնություն է ցուցաբերել Աղդամի շրջանի բնակիչներին։

Հիշեցնենք, որ ավելի վաղ դատարանը 4 ամսով կալանավորել էր Ադրբեջանի իշխանությունների կառուպցիոն գործունեությունը հետաքննող AbzasMedia-ի տնօրեն Ուլվի Հասանլիին, գլխավոր խմբագիր Սևինջ Վաքըֆքըզիին, աշխատակից Մոհամմեդ Կեկալովին։ Նրանք մեղադրվում են փողերի մաքսանենգության մեջ։ Դեկտեմբերի 1-ին էլ Բաքվի Խաթայի դատարանը AbzasMedia-ի մեկ այլ լրագրողի՝ Նարգիզ Աբսալամովին երեք ամսով կալանավորելու որոշում էր կայացրել՝ մի խումբ անձանց կողմից նախնական համաձայնությամբ մաքսանենգության մեղադրանքով։

Էմմա Չոբանյան