15.09.2026 | 17:56
Ըստ ՔԿ-ի՝ Տաթևի վարչական ղեկավար Գոռ Մինասյանը անասնապահին տարիներ շարունակ հարկադրել է անվճար աշխատել
Մոսկվան հուսով է, որ Ալիևը կմասնակցի Պետերբուրգում ԱՊՀ գագաթնաժողովին․ Լավրովը՝ Բայրամովին
Քաղաքականություն
05.12.2023 | 13:40
Ռուսական կողմը հուսով է, որ Ադրբեջանի նախագահ Իլհամ Ալիևը կմասնակցի Անկախ Պետությունների Համագործակցության (ԱՊՀ) ոչ պաշտոնական գագաթնաժողովին, որը տեղի կունենա Սանկտ Պետերբուրգում։ Այս մասին հայտարարել է ՌԴ ԱԳ նախարար Սերգեյ Լավրովը Ադրբեջանի արտգործնախարար Ջեյհուն Բայրամովի հետ բանակցությունների մեկնարկին։
«Ավանդույթի համաձայն՝ Սուրբ Ծննդյան տոների սկզբում Սանկտ Պետերբուգում տեղի կունենա Եվրասիական տնտեսական բարձրագույն խորհրդի նիստը և ԱՊՀ ոչ պաշտոնական գագաթնաժողովը, որտեղ մենք հուսով ենք տեսնել, ինչպես եղել է նախորդ տարիներին, Ադրբեջանի նախագահ Իլհամ Ալիևին»,- ասել է Լավրովը։
Նա նշել է, որ դեկտեմբերի 18-ին էլ Մոսկվայում Ադրբեջանի վարչապետ Ալի Ասադովը մասնակցելու է ԱՊՀ երկրների կառավարությունների ղեկավարների հանդիպմանը։
ՌԴ ԱԳ նախարարը նաև հավելել է, թե տարածաշրջանային «3+3» հարթակն արդեն ավելի ու ավելի խոստումնալից է դառնում։
«Արդեն բովանդակություն է ստանում Իլհամ Ալիևի նախաձեռնությունը, այսպես կոչված, «3+3» տարածաշրջանային հարթակի ձևավորման վերաբերյալ՝ հարավկովկասյան երեք երկրները և նրանց երեք հարևանները։ Սա նույնպես խոստումնալից ձևաչափ է։ Ուրախ կլինեմ լսել ձեր գնահատականները այս ուղղությամբ հետագա քայլերի մասին»,- ասել է Լավրովը։
Ռուսաստանցի պաշտոնյան նշել է, որ հանդիպմանը կարծիքներ են փոխանակելու նաև հայ-ադրբեջանական հարաբերությունների կարգավորման վերաբերյալ։
Էմմա Չոբանյան
