29.04.2026 | 22:45
ՀՀ տարածքում ավտոճանապարհները հիմնականում անցանելի են
Ռուսաստանը հայտարարել է Ղրիմի ուղղությամբ ԱԹՍ-ների զանգվածային հարձակման փորձի մասին
Քաղաքականություն
05.12.2023 | 13:02
Ռուսաստանի պաշտպանության նախարարությունը պնդում է, որ բռնակցված Ղրիմը երեքշաբթի գիշերը և առավոտյան ենթարկվել է անօդաչու թռչող սարքերի զանգվածային հարձակման, փոխանցում է BBC-ի ռուսական ծառայությունը։
Նախարարության առաջին հայտարարությունը հրապարակվել է Մոսկվայի ժամանակով ժամը 6:00-ին մոտ․ ըստ այդ հաղորդագրության՝ գիշերը ոչնչացվել է 22 անօդաչու թռչող սարք, ևս 13-ը խոցվել է Ազովի ծովի և թերակղզու վրա։
Մեկ ժամ չանցած հրապարակվել է մամուլի նոր հաղորդագրություն, ըստ որի՝ ժամը 6:00-ի սահմաններում «ճնշվել» է Ղրիմի վրա ավիացիոն տիպի անօդաչու թռչող սարքի հարձակում իրականացնելու հերթական փորձը, հակաօդային պաշտպանության համակարգերը խոցել են չորս անօդաչու թռչող սարքեր, ևս երկուսը ոչնչացվել է Ազովի ծովում:
Այսպիսով՝ Ռուսաստանի պաշտպանության նախարարության տվյալներով՝ հարձակմանը մասնակցել է ընդհանուր առմամբ 41 անօդաչու թռչող սարք։ Գիշերը Ղրիմի կամրջով երթևեկությունը դադարեցվել է:
Ռուսաստանի կողմից նշանակված Խերսոնի շրջանի օկուպացված մասի ղեկավար Վլադիմիր Սալդոն ավելի ուշ իր Telegram ալիքում գրել է, որ «թշնամին մտադիր էր հարվածել մեր ՀՕՊ համակարգին, այնուհետև հարձակվել վառելիքի պահեստավորման և այլ կարևոր օբյեկտների վրա»:
Պաշտոնական Կիևը մինչ այս չի մեկնաբանել ռուսական կողմի պնդումները, որ ՌԴ-ի Ուկրաինա ներխուժումից հետո 2014 թվականին անեքսիայի ենթարկված Ղրիմը պարբերաբար հրթիռային և ԱԹՍ-ների հարձակումների է ենթարկվում։
