18.03.2026 | 18:39
Ալիևներն այցով Արցախում են
Իսրայելը Գազայի բնակիչներին խնդրում է տարհանվել՝ առանց անվտանգության երաշխիքներ տրամադրելու․ Human Rights Watch
Քաղաքականություն
04.12.2023 | 15:00
Human Rights Watch-ի ծրագրի տնօրեն Սարի Բաշին BBC-ին ասել է, որ Իսրայելը վերսկսել է ցամաքային հարձակումն ու օդային հարվածները Գազայի հատվածի վրա՝ «առանց համապատասխան նախազգուշական միջոցներ ձեռնարկելու խաղաղ բնակչությանը պաշտպանելու համար»:
Իսրայելի պաշտպանության բանակը, նրա խոսքով, «մարդկանց ասում է փախչել, երբ չկա փախչելու անվտանգ տեղ, այնտեղ հասնելու ապահով ճանապարհ»: Բացի այդ, նա անարդյունավետ է համարում Իսրայելի պաշտպանության բանակի կողմից տրված նախազգուշացումները, որոնցում Գազայի հատվածի բնակիչներին կոչ է անում լքել մարտական գոտիները։
«Իսրայելի զինվորականները QR կոդեր են տեղադրել սոցցանցերում՝ խնդրելով առանց էլեկտրականության կամ ինտերնետի հասանելության մարդկանց ինչ-որ կերպ սքանավորել այն՝ պարզելու, թե ուր պետք է գնան։ Նրանք ուղղում էին քարտեզները, քանի որ դրանցում սխալներ կային։ Տեղեկություններ կան, որ մարդիկ են զոհվել տարհանման փորձի ժամանակ։ Օդային հարվածները շարունակվում են այն շրջաններում, որտեղ իսրայելցի զինվորականները կարգադրել էին մարդկանց տարհանել: Չկան երաշխիքներ, հայտարարություններ, որ եթե մարդիկ տեղափոխվեն այլ տարածքներ, նրանք չեն ռմբակոծվի»,- պնդում է Բաշին:
Հավելենք, որ Իսրայելը հերքում է մեղադրանքները, թե բավականաչափ ուշադրություն չի դարձնում խաղաղ բնակիչների կյանքին՝ մեղադրելով ՀԱՄԱՍ-ին մարդկանց որպես կենդանի վահան օգտագործելու մեջ։
