Քաղաքականություն
01.12.2023 | 16:45
Իսրայելի իշխանությունները դեռ մեկ տարի առաջ հետախուզությունից ծրագիր են ստացել, որին համահունչ էլ ՀԱՄԱՍ-ն իրականացրել է հոկտեմբերի 7-ի հարձակումը, բայց այն համարել են չափազանց հեռուն գնացող, իսկ հաջողության հասնելու զինյալների հնարավորությունները՝ աննշան։ Այս մասին գրում է The New York Times-ը՝ վկայակոչելով փաստաթղթերը, էլեկտրոնային նամակները և հարցազրույցները, որոնք ուսումնասիրել են լրագրողները, փոխանցում է DW-ի ռուսական ծառայությունը։
Առաջին հերթին խոսքը «Երիքովի պատ» գաղտնագրված ծրագրի մասին է, որի 40 էջերում քայլ առ քայլ նկարագրված է հոկտեմբերի 7-ին ՀԱՄԱՍ-ի կողմից իրականացված հարձակման սցենարը։ Փաստաթղթում նշված չէ հարձակման ծրագրված օրը, սակայն մանրամասն նկարագրված են՝ ինչպես հաղթահարել իսրայելական ամրությունները Գազայի հատվածի երկայնքով, ինչպես նաև գրավել իսրայելական քաղաքներն ու առանցքային ռազմակայանները, այդ թվում՝ նրանք, որտեղ գտնվում են Իսրայելի պաշտպանության բանակի ստորաբաժանումների շտաբները։
«ՀԱՄԱՍ-ը ցնցող ճշգրտությամբ հետևել է այս ծրագրին»,- գրում է NYT-ը:
Փաստաթուղթը նախատեսում էր հարձակման հենց սկզբում հրթիռների արձակում, անօդաչու թռչող սարքերի օգտագործում՝ սահմանին տեսախցիկների և ավտոմատ գնդացիրների վնասազերծման համար և զինյալների զանգվածային ներթափանցում Իսրայել՝ պարապլաններով, մոտոցիկլետներով և ոտքով, ինչը տեղի է ունեցել հոկտեմբերի 7-ին։ Նշվում է, որ ծրագիրը նաև մանրամասն տեղեկություններ է պարունակում իսրայելական ռազմական ուժերի, կապի կենտրոնների և տեղակայման մասին, որոնք հարցեր են առաջացնում, թե ինչպես է ՀԱՄԱՍ-ը հավաքել իր հետախուզական տվյալները և արդյո՞ք իսրայելական անվտանգության գործակալություններում արտահոսքեր են եղել։
Լրագրողները եզրակացնում են, որ ծրագիրը լայնորեն տարածվել է իսրայելական ռազմական և հետախուզական պաշտոնյաների շրջանում, սակայն փորձագետները եկել են այն եզրակացության, որ դրա իրականացումը դուրս է ՀԱՄԱՍ-ի հնարավորություններից: Պարզ չէ՝ արդյո՞ք պլանը տեսել են վարչապետ Բենիամին Նեթանյահուն և այլ քաղաքական առաջնորդներ։
Անցյալ տարի, երբ պլանը հայտնվել է Իսրայելի ձեռքում, Գազայի հատվածի հետ սահմանի պաշտպանության համար պատասխանատու ստորաբաժանման ներկայացուցիչները ենթադրել են, որ զինյալների մտադրությունները մնում են անորոշ։ Ավելի ուշ՝ 2023 թվականի հուլիսին, հետախուզությունը տեղեկություն է ստացել, որ ՀԱՄԱՍ-ի անդամները երկարատև զորավարժություններ են անցկացնում, որոնց բովանդակությունը նման է ծրագրում նկարագրվածին։
Հոդվածում ասվում է, որ պաշտոնատար անձինք մասնավոր զրույցներում խոստովանում են, որ եթե զինվորականները լրջորեն ընդունեին նախազգուշացումները և զգալի ուժեր ուղարկեին հարավ, որտեղ սկսվել էր ՀԱՄԱՍ-ի հարձակումը, Իսրայելը կարող էր զսպել հարձակումները կամ նույնիսկ կանխել դրանք։
Իսրայելի բանակն ու անվտանգության գործակալությունը հրաժարվել են թեմայի վերաբերյալ մեկնաբանություններ տալ ամերիկյան պարբերականին։
Էմմա Չոբանյան
