15.12.2025 | 23:30
Պինոչետի բռնապետությունից ի վեր առաջին անգամ Չիլիի նախագահական ընտրություններում ծայրահեղ աջերի թեկնածուն հաղթել է
Բլինքենը մեկնել է Իսրայելից՝ հրաժարվելով մեկնաբանել ռազմական գործողությունների վերսկսումը․ WP
Քաղաքականություն
01.12.2023 | 21:42
ԱՄՆ պետքարտուղար Էնթոնի Բլինքենը, որն այցով Իսրայելում էր, հրաժարվել է մեկնաբանել հրեական պետության և պաղեստինյան ՀԱՄԱՍ շարժման միջև ռազմական գործողությունների դադարի ավարտը։ Այս մասին գրում է The Washington Post-ը (WP), որի լրագրողը Բլինքենին ուղեկցել է Մերձավոր Արևելք կատարած ուղևորության ժամանակ։
Պարբերականի տվյալներով՝ Գազայի հատվածում գործողությունները վերսկսելու մասին Իսրայելի պաշտպանության բանակի հայտարարությունն արվել է այն պահին, երբ Բլինքենի ավտոշարասյունը լքել է հյուրանոցը։ Երբ լրագրողներն ինքնաթիռում նրան հարցրել են մարտերի վերսկսման մասին, ԱՄՆ պետքարտուղարը հրաժարվել է մեկնաբանել, նշում է թերթը։
Ավելի վաղ Իսրայելի «Կան» պետական ռադիոն հայտնել էր, որ Բլինքենն ավարտել է Իսրայել կատարած այցը և մեկնել Արաբական Միացյալ Էմիրություններ։ Դուբայում նա մտադիր է մասնակցել արաբական երկրների հետ քննարկումներին՝ կլիմայի և անկլավի ապագայի թեմայով։ Ըստ ռադիոկայանի՝ դա տեղի է ունեցել Գազայի հատվածում ռազմական գործողությունների վերսկսումից «մի քանի րոպե» անց՝ ՀԱՄԱՍ շարժման կողմից զինադադարի խզումից հետո։
Նոյեմբերի 30-ին ԱՄՆ պետքարտուղարն ասել է, որ ամերիկյան վարչակազմը Մերձավոր Արևելքում իր առաջնային նպատակն է համարում Գազայի հատվածում մարդասիրական դադարի երկարաձգումը՝ պատանդներին ազատելու և օգնություն տրամադրելու նպատակով։
Ամերիկյան լրատվամիջոցների փոխանցմամբ՝ կողմերը դեռևս բանակցություններ են վարում դադարը վերսկսելու և պատանդների հնարավոր փոխանակման շուրջ՝ չնայած ուրբաթ օրը ռազմական գործողությունների շարունակմանը։
