ՀՀ-ն ՌԴ-ի և ԱՊՀ այլ պետությունների հետ նոր համաձայնագիր է ստորագրելու

Հայաստանը շարունակում է խորացնել համագործակցությունը ԱՊՀ երկրների հետ։ Factor.am-ը ՀՀ կառավարության մշակած փաստաթղթերից տեղեկացավ, որ ՀՀ-ն պատրաստվում է ԱՊՀ մասնակից պետությունների հետ դատափորձագիտական գործունեության ոլորտում համակարգող խորհուրդ կազմավորելու մասին համաձայնագիր ստորագրել։

Այս համաձայնագրի կնքումը ենթադրում է դատափորձագիտական ոլորտում բազմակողմանի և կանոնավոր փոխգործակցության հաստատում՝ միտված հանցավորության դեմ պայքարի, ինչպես նաև՝ տվյալ ոլորտում քաղաքացիների շահերի ապահովման գործում արդյունավետության բարձրացմանը։

ՀՀ արդարադատության նախարարության փոխանցմամբ՝ համաձայնագրի կնքմամբ նախատեսվում է ԱՊՀ մասնակից պետությունների դատական փորձաքննությունների մարմինների ղեկավարների միջպետական խորհրդի ստեղծում (այսուհետ՝ Խորհուրդ):

Խորհուրդը իր իրավասությունների շրջանակում ապահովելու է ԱՊՀ մասնակից պետությունների դատական փորձաքննության մարմինների փոխգործակցության կազմակերպումն ու համակարգումը, ինչպես նաև՝ միջազգային կազմակերպությունների հետ դատափորձագիտական ոլորտում մասնագիտական համագործակցությունը։

Համաձայնագրով նախատեսվում է, որ կողմերից յուրաքանչյուրը նշանակում է պետական իրավասու մարմին, որը պատախանատու է Համաձայնագրի դրույթների իրականացման և դատափորձագիտական ազգային մարմինների միջև համագործակցության համակարգման համար:

Այս համաձայնագիրը ստորագրել են Ռուսաստանը, Բելառուսը, Տաջիկստանը, Ուզբեկստանը, Ղրղզստանը, Ղազախստանը։ Այն դեռ չեն ստորագրել Հայաստանը, Ադրբեջանը, Մոլդովան, Թուրքմենստանը և Ուկրաինան:

Նշենք, որ դեռ 2014 թվականից պաշտոնական Կիևը հայտարարել էր Ուկրաինայի՝ ԱՊՀ-ից դուրս գալու որոշման մասին։ Այս երկիրը դե յուրե շարունակում է հանդիսանալ ԱՊՀ անդամ, բայց պաշտոնական միջոցառումներին չի մասնակցում։

Հիշեցնենք՝ Նիկոլ Փաշինյանը հոկտեմբերի 13-ին չէր մասնացել Բիշքեկում կայացած ԱՊՀ մասնակից պետությունների ղեկավարների խորհրդի նիստին:

Նարեկ Կիրակոսյան