«Դատախազությունը հայց է հարուցել մահացած անձանց դեմ». Ամրամ Մակինյան

Դատախազությունը Սերժ Սարգսյանից և դիզվառելիքի գործով մյուս մեղադրյալներից համապարտության կարգով պահանջում է 500 մլն դրամ գումար` որպես ենթադրյալ հանցագործությամբ պետությանը պատճառված վնասի հատուցում: Երևանի ընդհանուր իրավասության դատարանում Սարգսյանի և մյուսների վերաբերյալ քրեական գործի քննության շրջանակներում Սարգսյանի պաշտպանները դիրքորոշում հայտնեցին, որ դատարանը պետք է վերադարձնի հայցադիմումը, իսկ չվերադարձնելու և քննելու դեպքում` պետք է մերժի այն: Պաշտպաններից Ամրամ Մակինյանը նշեց, որ եթե պետությունը «Ֆլեշ» ընկերությանը կես մլրդ դրամ գումար է տվել, վերջինս էլ ինչ-որ չափով հարկ է վերադարձրել պետությանը, հետևաբար՝ չի կարող պետությանը պատճառված ենթադրյալ վնասի չափը լինել ճիշտ այնքան, որքան հանցագործությամբ պատճառված գումարի չափն է` ըստ քրեական գործի:

Մակինյանը նաև նշեց, որ Դատախազությունը ոչ թե հենց գումարի, այլ պետությանը պատճառված ենթադրյալ վնասին համարժեք գույքի պահանջ կարող էր ներկայացնել: Պաշտպանը նաև հարց բարձրացրեց, թե ինչպես է դատախազությունը պատկերացնում մեղադրյալների` համապարտության կարգով ենթադրյալ վնասի հատուցումը, եթե նրանցից երկուսը գործի քննության ընթացքում մահացել են և նրանց նկատմամբ հետապնդումը մահվան հիմքով դադարեցվել է:

«Դատախազությունը հայց է հարուցել մահացած անձանց դեմ»,- ասաց Ամրամ Մակինյանը: Դատարանը դիրքորոշում հայտնեց, որ հայցադիմումը չընդունելու հիմքեր չկան, բայց ինչ վերաբերում է դրանում նշված գումարի չափին, հայցի` ըստ էության բավարարման կամ մերժման հարցին, ապա դատարանն այս պահին չի կարող անդրադառնալ այդ հարցերին, դրանց կանդրադառնա վերջնական դատական ակտով:

Արաքս Մամուլյան