Արաս Օզբիլիսը՝ ՀՖՖ նախագահի թեկնածու

Ֆուտբոլիստի կարիերան ավարտած Արաս Օզբիլիսը հայտարարեց Հայաստանի ֆուտբոլի ֆեդերացիայի նախագահի պաշտոնում առաջադրվելու մասին․ գրում է sport.news.am-ը։

«Ես միշտ ասել եմ, որ ես իմ կարիերայից հետո ուզում եմ հայկական ֆուտբոլին օգուտ տալ՝ կլինի մարզիչ, թե մենեջեր: Ես մտածում եմ, որ հայկական ֆուտբոլն այն խաչմերուկի վրա է, ու շատ կարեւոր խաչմերուկի, որը շատ կարեւոր ժամանակի մեջ է: Հայկական ֆուտբոլը աճելու տեղ ունի: Այդ պատճառով ես իմ թեկնածությունը դնում եմ ՀՖՖ նախագահի ընտրություններում:

Մտածում եմ, որ իմ փորձով, անցած ճանապարհով եւ նվիրվությամբ կարող եմ հայկական ֆուտբոլին մեծ օգուտ տալ: Այդ փոփոխությունների համար ինձ պետք է այն դիրքը, որ կարողանամ դրանք իրագործել:

Ես դուրսն եմ մեծացել՝ Հոլանդիայում: Ամենադժվարը լինելու է մտածելակերպ փոխելը: Խաղացողների, ծնողների, ակումբների մտածելակերպը պետք է փոխենք, որն ամենաբարդն է:

Հայկական ֆուտբոլը ճիշտ ճանապարհի վրա է, Հայաստանում ֆուտբոլը դարձել է հայտնի մարզաձեւ: Շատ բաներ կան, որ մտածում եմ՝ կարող ենք ավելի լավ անել:

Քանի դեռ ընտրված չեմ, չեմ ցանկանում առաջ ընկնել, այլ մանրամասների մասին ասել: Դեկտեմբերի 23-ից հետո, եթե ընտրվեմ, ազգային հավաքականին վերաբերող բոլոր հարցերին կպատասխանեմ:

Ինչ վերաբերում է իմ կարծիքին, ոսկե սերդի ժամանակը շատ լավն էր: Ներկայիս կազմում էլ մեծ պոտենցիալ եմ տեսնում: Պատկերացրեք՝ Օզբիլիսը, Տիկնիզյանը, Սպերցյանը չեն գալիս: Պետք է մտածենք մեր ֆուտբոլիստներին ունենալու մասին: Մտածենք, թե ովքեր են գալու, եթե դրսի խացաղոցները չգան:

Ես որեւէ մեկի խորհրդով, հավատալով չեմ դնում իմ թեկնածությունը: Սա իմ անձնական որոշումն է: Քանի որ վերջին ակումբս «Ուրարտուն» է եղել, այդպես է ստացվել, որ ակումբից եմ առաջադրում:

Ես գալիս եմ խնդիրներ լուծելու: Տեսնում եմ խնդիրներ մանկապատանեկան ֆուտբոլում: Ես վստահ եմ, որ հայկական ֆուտբոլին կարող եմ օգուտ տալ եւ փոխել։

Եթե չընտրվեմ, կշարունակեմ մնալ հայկական ֆուտբոլում, կփորձեմ օգնել մեր ֆուտբոլին: Իմ նպատակն է զարգացնել հայկական ֆուտբոլը: Ընտանիքիս հետ տեղափոխվել եւ ապրում եմ Հայաստանում: Եթե չընտրվեմ, գուցե մարզիչ, մենեջեր աշխատեմ, կամ իմ ակադեմիան ունենամ»,- ասաց Արաս Օզբիլիսը:

Նախագահի թեկնածու կառաջադրի նաեւ «Փյունիկ» ֆուտբոլային ակումբը: NEWS.am Sport-ի թղթակցի հետ զրույցում «Փյունիկի» սեփականատեր Արթուր Սողոմոնյանը հայտնել էր, որ ինքը չի առաջադրվի, սակայն ակումբն այլ թեկնածուի կառաջադրի:

Թեկնածուների առաջադրման վերջնակաժամկետը  2023թ. նոյեմբերի 23-ն է ներառյալ։

ՀՖՖ նախագահի ընտրությունը տեղի կունենա դեկտեմբերի 23-ին: