08.11.2026 | 12:17
Գորայք-Զանգեր ճանապարհին ձյան պատճառով 6 բեռնատար և մեկ մարդատար ավտոմեքենա արգելափակվել են
Ադրբեջանը Հայաստանին առաջարկում է հանդիպում անցկացնել սահմանին
Քաղաքականություն
21.11.2023 | 16:54
Պաշտոնական Բաքուն արձագանքել է ՀՀ-ի կողմից խաղաղության պայմանագրի առաջարկների փոխանցմանը։ Ադրբեջանի ԱԳՆ-ի հրապարակած հայտարարության մեջ նշվում է, թե «այն փաստը, որ Հայաստանին մոտ 2,5 ամիս է պահանջվել խաղաղության համաձայնագրի նախագծի վերաբերյալ Ադրբեջանի առաջարկներին արձագանքելու համար, լրջորեն հետաձգել է գործընթացը»։
«Խաղաղության բանակցություններում այս լճացումը չի նպաստում տարածաշրջանի կայունությանը և բարգավաճմանը։ Ադրբեջանը պատրաստ է Հայաստանի հետ երկկողմ ուղիղ բանակցությունների՝ հնարավորինս արագ խաղաղության համաձայնագիրը կնքելու համար։ Մենք կարծում ենք, որ երկու երկրները պետք է միասին որոշեն իրենց հետագա հարաբերությունները»,- ասվում է հայտարարության մեջ։
Բաքուն Երևանին առաջարկել է երկկողմ բանակցություններն անցկացնել պետական սահմանին։
«Երկու երկրներն էլ պատասխանատու են խաղաղ գործընթացի շարունակման համար, ներառյալ՝ փոխադարձ ընդունելի վայր ընտրելը կամ պետական սահմանին հանդիպելու որոշում կայացնելը: Կոչ ենք անում հայկական կողմին՝ թույլ չտալ նոր անհարկի ձգձգումներ և հուսով ենք, որ նրանք դրականորեն կարձագանքեն այս կոչին, որպեսզի մոտ ապագայում սկսվեն բանակցությունները»,- ասվում է հայտարարությունում։
Հիշեցնենք՝ Հայաստանի ԱԳՆ-ն այսօր հայտնել էր ,որ Ադրբեջանին են փոխանցվել խաղաղության պայմանագրի առաջարկները։
«Հետևելով ՀՀ վարչապետ Նիկոլ Փաշինյանի նոյեմբերի 18-ի հրապարակային հայտարարությանը՝ ակտիվացնելու դիվանագիտական ջանքերը Ադրբեջանի հետ խաղաղության պայմանագրի ստորագրմանը հասնելու համար, հայկական կողմը ադրբեջանական կողմին է ներկայացրել Համաձայնագրի իր 6-րդ առաջարկը։ Հայաստանը հավատարիմ է մնում նախապես հայտարարված սկզբունքների հիման վրա հարաբերությունների կարգավորման փաստաթուղթ կնքելուն և ստորագրելուն»,-ասվում է ՀՀ ԱԳՆ-ի X-ի էջում գրառման մեջ։
Էմմա Չոբանյան
