26.06.2026 | 19:46
ՔՊ-ն նախընտրական քարոզարշավն իրականացրել է պետական բյուջեի հաշվին․ «Հայաստան» դաշինքի ներկայացուցիչ. ՏԵՍԱՆՅՈՒԹ
Հայաստանի դուքենդո ֆեդերացիայի մարզիկները 18 մեդալ են նվաճել աշխարհի առաջնությունում
20.11.2023 | 16:34
ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ընդունել է Հայաստանի դուքենդո ֆեդերացիայի պատվիրակությանը՝ նախագահ Հայկ Վարդանյանի գլխավորությամբ․ տեղեկացնում են ԿԳՄՍՆ-ից։
Ֆեդերացիայի պատանի մարզիկները հոկտեմբերի վերջին Մյունխենում մասնակցել են ISKA-ի (Սպորտային կարատեի միջազգային ասոցիացիա) աշխարհի առաջնությանը և 2 ոսկե, 2 արծաթե և 14 բրոնզե մեդալ նվաճել: Աշխարհի առաջնությանը մասնակցած 18 մարզիկներից 12-ը դարձել են մեդալակիրներ: 3 ձևով անցկացված մրցումներում մեր մարզիկները թիմային հաշվարկում զբաղեցրել են 15-րդ տեղը՝ ներկայացուցիչներ ունենալով միայն պատանիների պայքարում: Աշխարհի առաջնությանը, ընդհանուր առմամբ, 37 երկրի պատանի, երիտասարդ և մեծահասակ մարզիկներ են մասնակցել:
Ընդ որում՝ Հայաստանն առաջին անգամ է մասնակցել ISKA-ի աշխարհի առաջնությանը:
ԿԳՄՍ նախարարի տեղակալ Կարեն Գիլոյանը ողջունել է հյուրերին և շնորհավորել պատանի մարզիկներին գրանցած բարձր արդյունքների կապակցությամբ:
«Այս տարիքից դնում եք ձեր ապագայի հիմքն ու քայլեր եք կատարում՝ ուժեղ մարդ դառնալու ճանապարհին: Առողջ ապրելակերպի ու ֆիզիկական պատրաստվածության տեսանկյունից շատ կարևոր փորձառություն եք ունենում: Վստահ եմ՝ այս ամենը կնպաստի ոչ միայն լավ մարզիկ, այլև հայրենիքի համար արժանի քաղաքացի դառնալուն»,- ասել է Կարեն Գիլոյանը` բարձր գնահատելով նաև ֆեդերացիայի ղեկավարության գործունեությունը` ի նպաստ Հայաստանում մարզաձևի զարգացման ու մասսայականացման:
Ֆեդերացիայի նախագահ Հայկ Վարդանյանի գնահատմամբ՝ աշխարհի առաջնությունում գրանցած արդյունքները բավականին տպավորիչ են. «Մասնակցել ենք շատ փոքր թիմով: Հատկապես եվրոպական երկրները 200-ից ավելի մարզիկներ ունեին: ISKA-ի մրցումները բավականին լուրջ են: Մեր մարզիկներից երկուսը նվաճել են ոսկե, երկուսը՝ արծաթե մեդալներ, իսկ մյուսները՝ բրոնզե մեդալներ»:
Հայ մարզիկները հունվարի վերջին ԱՄՆ-ում միջազգային մրցաշարի կմասնակցեն, իսկ 2024 թվականի հունիսի վերջին՝ աշխարհի առաջնության:
Հայկ Վարդանյանի խոսքով՝ սպորտային կարատեին մեծ ուշադրություն են դարձնում: Մասնավորապես՝ այս պահին Երևանում գործում է մարզաձևի ավելի քան 85, իսկ ՀՀ տարբեր մարզերում՝ ավելի քան 60 դպրոց: Մարզադպրոցներում ընդունելությունը կատարվում է 5 տարեկանից:
