30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Հաջիևը հայտարարել է, թե «Ադրբեջանը ձգտում է խաղաղության արդար ու լեգիտիմ նոր իրողություններով»
Քաղաքականություն
17.11.2023 | 13:03
Ադրբեջանի նախագահի օգնական Հիքմեթ Հաջիևը քննադատել է ԵԱՀԿ Մինսկի համանախագաների՝ այդ թվում, ԱՄՆ-ի գործունեությունը և հերթական անգամ արդարացրել Արցախի դեմ ագրեսիան ու էթնիկ զտումը։
«Ադրբեջանը ձգտում է Հայաստանի հետ խաղաղության և երկկողմ հարաբերությունների կարգավորման։ Ադրբեջանը հաստատել է Եվրասիայի ավելի լայն քարտեզի վրա ամենաերկարատև հակամարտություններից մեկի լուծման մոդելը։ ԵԱՀԿ-ն չկարողացավ լուծել հակամարտությունը, թեև ղարաբաղյան հակամարտությունը ԵԱՀԿ-ի առջև ծառացած խնդիրներից մեկն է հենց այս ինստիտուտի ստեղծման օրից։ Մինսկի խումբը ձախողվել է, Մինսկի խմբի համանախագահության ինստիտուտը ձախողվել է (ի դեպ, ԱՄՆ եղել է ՄԽ համանախագահներից մեկը), քանի որ այդ ինստիտուտի առաքելությունն էր պահպանել և շարունակել «Հայաստանի օկուպացիան» Ադրբեջանի դեմ» ,- գրել է Հաջիևը թվիթերյան իր էջում։
Չնայած Բաքուն հերթական անգամ հրաժարվել է արևմտյան հարթակներում պաշտոնական Երևանի ներկայացուցիչների հետ հանդիպումից՝ Հաջիևը հայտարարել է, թե «ռազմական օկուպացիայի և անարդարության այս գլուխն այժմ ավարտված է և, հետևաբար, Ադրբեջանի օրակարգն այժմ խաղաղության և Հայաստանի և Ադրբեջանի միջև երկկողմ հարաբերությունների կարգավորումն է։ Բայց խաղաղության ցանկացած ներգրավվածություն պահանջում է, որ երկու կողմերը կատարեն իրենց դերը, և Հայաստանը նույնպես պետք է կատարի իր դերը և դրսևորի բարի կամք: Այժմ մեր տարածաշրջանում ի հայտ են եկել նոր իրողություններ և ստատուս քվո։ Այս նոր իրողությունները հիմնված են «արդարության, օրինականության և լեգիտիմության վրա»- գրել է Հաջիևը։
Ի դեպ, Ադրբեջանի նախագահի օգնականի գրառմանը արձագանքել է Բաքվում ԱՄՆ նախկին դեսպան Ռիչարդ Կաուզլարիչը՝ գրելով․
«ԵԱՀԿ-ն ու Միսնկի խումբը չեն ձախողել, Բաքուն ու Երևանն են ձախողել քայլեր ձեռնարկել հակամարտության խաղաղ կարգավորման ուղղությամբ։ Դադարեք ուրիշներին մեղադրել ձեր սխալների համար»։
Էմմա Չոբանյան
