Բորելը ողջունել է Հայաստանի անդամակցությունը Միջազգային քրեական դատարանին

ԵՄ արտաքին քաղաքականության  ու անվտանգության հարցերով բարձր ներկայացուցիչ Ժոզեպ Բորելը ողջունել է Հայաստանի կողմից Հռոմի ստատուտի վավերացումը ու Միջազգային քրեական դատարանին անդամակցությունը։

«Միջազգային քրեական դատարանի Հռոմի ստատուտի վավերացումը վկայում է Հայաստանի հավատարմությունը միջազգային իրավունքին և մարդու իրավունքների պաշտպանությանը։ Յուրաքանչյուր միացում մեզ ավելի է մոտեցնում համընդհանուր մասնակցությանը և ամենածանր հանցագործությունների անպատժելիությանը վերջ տալուն»,- ասվում է Բորելի X-ի էջում գրառման մեջ։

Հիշեցնենք, որ Հայաստանը պաշտոնապես դարձել էր Միջազգային քրեական դատարանի անդամ 124-րդ երկիրը։ ՄԱԿ-ում Հայաստանի մշտական ներկայացուցիչ Մհեր Մարգարյանը վավերացման փաստաթուղթը ներկայացրել էր Միավորված ազգերի կազմակերպության Իրավական հարցերի գրասենյակի Պայմանագրի բաժնի տնօրենին՝ որպես Հռոմի կանոնադրության պահապան ի պահ հանձնելու ՄԱԿ-ի Գլխավոր քարտուղարին:

Հավելենք` ՀՀ  նախագահ Վահագն Խաչատուրյանը հոկտեմբերի 13-ին ստորագրել էր 1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրությունը վավերացնելու և կանոնադրության 12-րդ հոդվածի 3-րդ մասի հիմքով «Հայաստանի Հանրապետության կողմից միջազգային քրեական դատարանի իրավազորությունը հետադարձորեն ճանաչելու մասին» հայտարարություն ընդունելու մասին օրենքը:

Ազգային ժողովը հոկտեմբերի 3-ին էր  60 կողմ, 22 դեմ ձայներով ընդունել Միջազգային քրեական դատարանի Կանոնադրությունը  վավերացնելու և հետադարձ ուժով իրավազորությունը ճանաչելու մասին հայտարարության օրենքի նախագիծը:

Էմմա Չոբանյան