24.11.2024 | 14:02
Ավտոմեքենայի դուռը փակվել է, 1-ամյա երեխան մնացել է ներսում․ օգնել են փրկարարները
Կորեայի Հանրապետության նորանշանակ դեսպանն իր հավատարմագրերի պատճենն է հանձնել ՀՀ ԱԳ նախարարի տեղակալին
Քաղաքականություն
16.11.2023 | 18:24
Նոյեմբերի 15-ին ՀՀ ԱԳ նախարարի տեղակալ Մնացական Սաֆարյանն ընդունել է Հայաստանում Կորեայի Հանրապետության նորանշանակ դեսպան Լի Դոհունին (նստավայրը՝ Մոսկվա)՝ հավատարմագրերի պատճենը հանձնելու կապակցությամբ․ տեղեկացնում են ՀՀ ԱԳՆ-ից։
ՀՀ ԱԳ նախարարի տեղակալը, շնորհավորելով դեսպանին նշանակման առթիվ, մաղթել է նրան ամենայն հաջողություն իր առաքելության իրականացման գործում: Կողմերը գոհունակությամբ արձանագրել են երկկողմ և բազմակողմ հարթակներում ձևավորված ակտիվ համագործակցությունը, ինչպես նաև փոխադարձ պատրաստակամությունը խորացնել ու զարգացնել քաղաքական երկխոսությունը և դիվանագիտական, տնտեսական կապերը: Պայմանավորվածություն է ձեռք բերվել ակտիվացնել քաղաքական խորհրդակցությունները երկու երկրների արտաքին քաղաքական գերատեսչությունների միջև:
Հանդիպման ընթացքում կողմերն անդրադարձ են կատարել տարբեր ձևաչափերով երկկողմ գործընկերությանը, իրավապայմանագրային դաշտին, քննարկել մշակութային, առողջապահության, տեղեկատվական տեխնոլոգիաների ոլորտներում համատեղ աշխատանքները, պետական կառավարման ոլորտում փորձի փոխանակման ուղղությամբ ծրագրերի իրականացման հնարավորությունը:
ՀՀ ԱԳ նախարարի տեղակալը հանգամանալից ներկայացրել է տարածաշրջանում ստեղծված իրադրությունը, մասնավորապես, Ադրբեջանի կողմից իրականացված ռազմական հարձակման և Լեռնային Ղարաբաղի ժողովրդի բռնի տեղահանման հետևանքով ստեղծված հումանիտար իրավիճակը: Մնացական Սաֆարյանն ընդգծել է նաև տարածաշրջանում տևական խաղաղության հաստատմանն ուղղված Հայաստանի ջանքերը՝ զրուցակցին ներկայացնելով ՀՀ կառավարության «Խաղաղության խաչմերուկ» նախաձեռնությունը:
Դեսպանը շնորհակալություն է հայտնել ջերմ ընդունելության համար և վստահեցրել, որ առավելագույն ջանքեր կներդնի հայ-կորեական փոխգործակցության հետագա զարգացման ուղղությամբ:
