Քաղաքականություն
14.11.2023 | 12:02
Վրաստանի APM Terminals Փոթի ընկերությունը «Ազատություն» ռադիոկայանի վրացական ծառայությանը հաստատել է ֆրանսիական «Բաստիոն» զրահամեքենաների տարանցումը Հայաստան։
«Կոնկրետ տվյալ դեպքում բեռը ժամանել է ԵՄ երկրից՝ Ֆրանսիայից և ուղարկվել է Հայաստան՝ երկիր, որի նկատմամբ պատժամիջոցներ չեն տարածվում։ Բացի այդ, Վրաստանի կառավարության կողմից հստակ ցուցումների և միջազգային կարգավորիչների կողմից սահմանված սահմանափակումների բացակայության դեպքում APM Terminals Poti-ն չի կարող անհիմն կերպով հրաժարվել բեռների ընդունումից, որոնք պատժամիջոցների տակ չեն»,-ասել է Փոթի նավահանգիստը շահագործող ընկերությունը։
Հիշեցնենք, որ ավելի վաղ ադրբեջանական քարոզչական լրատվամիջոցները տեղեկություններ ու լուսանկարներ էին հրապարակել՝ պնդումով, թե վրացական Փոթի է ժամանել Ֆրանսիայից «Բաստիոն» զրահատեխնիկայի խմբաքանակը, որը նախատեսված է Հայաստանի համար։ Այնուհետև Ադրբեջանի ԱԳՆ-ն դատապարտող հայտարարություն էր տարածել։
Factor TV-ն ՀՀ ՊՆ խոսնակին խնդրել էր մեկնաբանել շրջանառվող այս տեղեկությունները։
«Հայաստանի և Ֆրանսիայի՝ պաշտպանության բնագավառում համագործակցության վերաբերյալ պաշտոնական հաղորդագրություններից և հայտարարություններից զատ այս պահին որևէ լրացուցիչ տեղեկություն չենք կարող հայտնել»,- ասել էր ՊՆ խոսնակ Արամ Թորոսյանը։
Հիշեցնենք՝ Երևանն ու Փարիզը պաշտպանական ոլորտում համագործակցության վերաբերյալ պայմանագրեր են ստորագրել այս տարվա հոկտեմբերի 23-ին։
Էմմա Չոբանյան
