19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ալիևն ընդունել է ԵԱՀԿ ԽՎ նախագահի պատվիրակությանը
Քաղաքականություն
13.11.2023 | 14:50
Ադրբեջանի նախագահ Իլհամ Ալիևն ընդունել է ԵԱՀԿ Խորհրդարանական վեհաժողովի նախագահ Պիա Կաումանի պատվիրակությանը, գրում են ադրբեջանական լրատվամիջոցները։
Նշվում է, որ կողմերը քննարկել են Հարավային Կովկասում տիրող իրավիճակի և ԵԱՀԿ Խորհրդարանական վեհաժողովի դերը։
2020-ի նոյեմբերի 9-ի եռակողմ հայտարարության բոլոր դրույթները խախտած Ադրբեջանի նախագահը հայտարարել է, թե Հայաստանը, իբր, «չի կատարել եռակողմ հայտարարությամբ ստանձնած իր պարտավորությունները», և կրկին Երևանին մեղադրել «Արցախում ԶՈՒ պահելու, զորք ու ականներ տեղափոխելու, ինչպես նաև Ադրբեջանի և Նախիջևանի միջև հաղորդակցություն ապահովելու պարտավորությունը չկատարելու մեջ»։
Ալիևը, միաժամանակ, նշել է, թե Ադրբեջանը Հարավային Կովկասում կայուն խաղաղության կողմնակից է և աջակցում է տարածաշրջանային խաղաղության օրակարգին, Հայաստանի հետ հարաբերությունների կարգավորմանը և խաղաղության պայմանագրի ստորագրմանը։ Ալիևը, սակայն, չի պարզաբանել, թե ինչու է հրաժարվում Հայաստանի հետ բանակցություններից։
Ադրբեջանի նախագահը նաև հայտարարել է, թե Բաքուն «ներկայացնում է համակեցության և վերադարձի իրավունքի հստակ և թափանցիկ ծրագիր, սակայն Հայաստանը մերժում է ադրբեջանցիների՝ Հայաստան վերադառնալու իրավունքը և որևէ կարծիք չի հայտնել այդ հարցում»։
Նշենք, որ ԵԱՀԿ Խորհրդարանական վեհաժողովի նախագահ Պիա Կաումանը տարածաշրջանային այց է կատարում Ադրբեջան, Վրաստան և Հայաստան: Նա Երևանում նախագահելու է ԵԱՀԿ ԽՎ նստաշրջանը, ինչպես նաև հանդիպելու է Արցախից բռնի տեղահանված հայերի հետ։
Էմմա Չոբանյան
