Կարեն Դեմիրճյանի անվան մարզահամերգային համալիրում հանդիսավոր արարողությամբ տրվել է Սամբոյի 2023 թվականի մեծահասակների աշխարհի առաջնության պաշտոնական մեկնարկը:
ԿԳՄՍ նախարարությունից տեղեկացնում են, որ միջոցառմանը ներկա են եղել ԿԳՄՍ նախարար Ժաննա Անդրեասյանը, Երևանի քաղաքապետ Տիգրան Ավինյանը, Հայաստանի ազգային օլիմպիական կոմիտեի նախագահ Գագիկ Ծառուկյանը, նախարարի տեղակալ Կարեն Գիլոյանը, սամբոյի Հայաստանի և միջազգային ֆեդերացիաների ղեկավարները:
ԿԳՄՍ նախարար Ժաննա Անդրեասյանը ողջունել է աշխարհի առաջնության մասնակիցներին, միջազգային ֆեդերացիայի ներկայացուցիչներին և Հայաստան ժամանած հյուրերին: Ժաննա Անդրեասյանը հաջող մրցելույթներ և ազնիվ պայքար է մաղթել առաջնության մասնակիցներին. «Կրկին հանդիպում ենք Կ. Դեմիրճյանի անվան մարզահամերգային համալիրում. դա նշանակում է, որ Հայաստանի մայրաքաղաքը ընդունել է մարզաշխարհի ներկայացուցիչներին: Ընդամենը վերջին երկու տարում այս մարզահամալիրում անցկացվել են բռնցքամարտի և ծանրամարտի Եվրոպայի առաջնությունները, ֆուտզալի և բասկետբոլի միջազգային մրցաշարեր, սամբոյի դեռահասների, պատանիների և երիտասարդների աշխարհի առաջնությունները:
Հիմա անզեն ինքնապաշտպանության՝ սամբոյի աշխարհի ուժեղագույնների հերթն է. մեկնարկում է մեծահասակների աշխարհի առաջնությունը: Մարզաձևի հիմքում նաև հայկական կոխ ըմբշամարտն է, հետևաբար Հայաստանում այն ամենասիրվածներից է»,- ասել է ԿԳՄՍ նախարարն ու հիշատակել մարզաձևի հայ նվիրյալներին՝ աշխարհի հնգակի չեմպիոն Գագիկ Ղազարյանին, աշխարհի քառակի չեմպիոն Գորիկ Մանուկյանին և մեր մյուս մրցանակակիրներին:
«Հայաստանի պատվիրակներն այսօր էլ պատրաստ են ազնիվ մրցակցության մեջ մտնել աշխարհի ավելի քան 70 երկրներից ժամանած տղամարդկանց մարզական ու մարտական սամբոյի, կանանց մարզական սամբոյի ներկայացուցիչների հետ՝ բաղձալի մեդալների համար: Սիրելի՛ հյուրեր, բարով եք եկել մշակույթի ու արվեստի, գիտության ու սպորտի երկիր՝ Հայաստան: Հուսով եմ՝ կհասցնեք լինել նաև երկրի տեսարժան վայրերում ու սիրել Հայաստանը՝ որպես հյուրընկալ երկիր: Ցանկությունս է, որ մեր երկրից հեռանալիս կրկին վերադառնալու ցանկություն ունենաք»,- եզրափակել է ԿԳՄՍ նախարարը:
Բացման արարողության ժամանակ պարային ու ակրոբատիկ շոու-ծրագրով ներկայացվել են սամբո մարզաձևի ավանդույթները, հայկական սամբոյի պատմությունը, որին հաջորդել է մասնակից ավելի քան 70 երկրների դրոշների շքերթը, այնուհետև Հայաստանի սամբոյի ֆեդերացիայի նախագահ Միքայել Հայրապետյանը «Խաղաղության մեդալով» է պարգևատրել Միջազգային ֆեդերացիայի նախագահ Վասիլի Շեստակովին: Ի դեպ, «Խաղաղության մեդալը» պատրաստել է աշխարհի չեմպիոն Սերգո Չախոյանը:
Սամբոյի միջազգային ֆեդերացիայի (FIAS) նախագահ Վասիլի Շեստակովը FIAS-ի անունից ողջունել է տարվա գլխավոր մարզական միջոցառման մասնակիցներին և հյուրերին: Միջազգային ֆեդերացիայի նախագահի խոսքով՝ այս տարի սամբո մարզաձևը տոնում է իր 85-ամյակը, և այդ առիթով Հայաստան են ժամանել անվանի սամբիստներ աշխարհի տարբեր անկյուններից:
«Դուք ներկա եք իսկական մարզական տոնի այս հրաշալի մարզահամալիրում: Շնորհակալություն եմ հայտնում Հայաստանի կառավարությանը, ԿԳՄՍ նախարարությանը և Հայաստանի ազգային օլիմպիական կմիտեին, Հայաստանի սամբոյի ֆեդերացիային՝ աշխարհի առաջնությունն ամենաբարձր մակարդակով կազմակերպելու համար»,- նշել է Շեստակովը:
Հայաստանի սամբոյի ֆեդերացիայի նախագահ Միքայել Հայրապետյանը ևս ընդգծել է մեր երկրում առաջին անգամ անցկացվող մեծահասակների աշխարհի առաջնության կարևորությունը:
Նշենք, որ սամբոյի աշխարհի առաջնությանն ավելի քան 70 երկրի 650 մարզիկներ են մասնակցում:
