07.10.2026 | 14:29
Սեպտեմբերին Հայաստան է այցելել 290 հազար զբոսաշրջիկ․ Պապոյան
Լևոն Քոչարյանի գործով տուժողների մարմնի վրա որևէ բռնի հետք, մարմնական վնասվածք չի հայտնաբերվել. պաշտպաններ
Հասարակություն
10.11.2023 | 17:45
ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի պաշտպանները ծանոթացել են տուժողների դատաբժշկական փորձաքննությունների եզրակացություններին։
««Տուժողներ» Հրաչիկ Խաչատրյանի և Վարդան Հովհաննիսյանի մարնի վրա որևէ բռնի հետքեր, մարմնական վնասվածքներ չեն հայտնաբերվել»,- ֆեյսբուքյան էջում գրել է փաստաբան Էրիկ Ալեքսանյանը։
Հիշեցնենք, որ Լևոն Քոչարյանը մեղադրվում է Կառավարության շենքի դիմաց վարչապետ Նիկոլ Փաշինյանի հրաժարականի պահանջով ցույցերից մեկի ժամանակ ոստիկանների նկատմամբ բռնություն գործադրելու համար։ Քոչարյանը մեղադրանքը չի ընդունում, պնդում է, որ կարմիրբերետավորներն են իր նկատմամբ բռնություն գործադրել։ Լևոն Քոչարյանն ավելի քան մեկ ամիս մնաց կալանքի տակ, ազատ արձակվեց օրեր առաջ՝ նոյեմբերի 6-ին։
Կալանքի վերացման պատճառն այն էր, որ Լևոն Քոչարյանը ստացել է պատգամավորական մանդատ, քանի որ ԱԺ «Հայաստան» խմբակցության պատգամավոր Արմեն Չարչյանը հրաժարվել էր մանդատից։
«Հայաստան» դաշինքի համամասնական ցուցակում ընդգրկված հերթական հաջորդ թեկնածուները՝ Միհրան Թոմի Մադաթյանը, Անժելա Սեդրակի Նալբանդյանը, Գերասիմ Ավետիկի Վարդանյանը ինքնաբացարկի դիմումներ էին ներկայացրել ԿԸՀ, իսկ ցուցակի հերթական հաջորդ համարը Լևոն Քոչարյանն էր։ Նա կալանավայրից դուրս գալուց հետո լրագրողների հետ զրույցում նշել էր, որ իր համար անակնկալ էր կատարվածը։
Արփի Հակոբյան
