30.05.2026 | 16:48
Հանրապետության տոնի առթիվ ՀՀ հակակոռուպցիոն կոմիտեի նախագահի հրամանով մի շարք ծառայողներ են պարգևատրվել
Ալիևի ներկայացուցիչը հայտարարել է, թե «Հայաստանն Ադրբեջանի դեմ դիվանագիտական պատերազմ է սկսել»
Քաղաքականություն
09.11.2023 | 14:44
Իտալական Adnkronos հրատարակությանը տված հարցազրույցում Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը հայտարարել է, թե «խաղաղության համաձայնագրի դրական արդյունքը կախված կլինի Հայաստանի կառավարության անկեղծության աստիճանից»։
Ըստ նրա՝ հայկական կողմը մի կողմից խոսում է խաղաղության պայմանագիր կնքելու ցանկության մասին, մյուս կողմից՝ «դիվանագիտական պատերազմ սկսել Ադրբեջանի դեմ»։
«Վերջին օրերին Իտալիա այցելած Հայաստանի իշխանությունների ներկայացուցիչները չարաշահում են տարբեր միջազգային հարթակներ՝ ՄԱԿ-ի Անվտանգության խորհուրդը, Եվրախորհրդարանը, Եվրամիությունը և քաղաքականացնում այս հարցը։ Երևանը ոչ միայն շեղում է բոլոր շահագրգիռ կողմերի ուշադրությունը հիմնական ճանապարհից, այլև գործընթացը տանում է փակուղի։ Խաղաղության համաձայնագրի հասնելու համար Հայաստանը պետք է կատարի իր նախկին պարտավորություններն ու խոստումները։ Հայաստանը պետք է դադարի միաժամանակ իր նեղ քաղաքական նպատակներն իրականացնելու փորձերը և վերսկսի բանակցությունները խաղաղության համաձայնագրի նախագծի շուրջ ամենաբարձր մակարդակով»,- ասել է Ամիրբեկովը։
Հիշեցնենք, որ Բաքուն է մերժում Երևանի հետ արդեն իսկ եղած ձևաչափերով բանակցություններին մասնակցությունը և միայն հոկտեմբերին երկու անգամ հրաժարվել է Բրյուսելյան հարթակում հանդիպումից։
Ամիրբեկովը հայտարարել է, թե Հայաստանի մեղադրանքներն Ադրբեջանի հասցեին՝ կապված Ղարաբաղում էթնիկ զտումների և ցեղասպանության հետ, «բացարձակապես անհիմն են»։ Նա ասել է, որ «Ադրբեջանը հարգում է իր բոլոր քաղաքացիների իրավունքները, այդ թվում՝ Ղարաբաղի հայազգի բնակիչների»։ Ամիրբեկովը, սակայն, շրջանցել է կարևոր հանգամանք՝ այն, որ Լեռնային Ղարաբաղում Ադրբեջանի կողմից իրականացված էթնիկ զտման արդյունքում հայազգի բնակիչներ չկան։
Էմմա Չոբանյան
