30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
ՀԱՊԿ գլխավոր քարտուղարը հայտարարել է, որ Հարավային Կովկասում դեէսկալացիայի վերաբերյալ կառույցի նախագիծը մնում է ուժի մեջ
Քաղաքականություն
08.11.2023 | 15:10
Հավաքական անվտանգության պայմանագրի կազմակերպության (ՀԱՊԿ) նախագիծը, որն ուղղված է Հարավային Կովկասում իրավիճակի ապաէսկալացմանը, ուժի մեջ է մնում և կարող է ընդունվել կոնսենսուսի դեպքում։ Այս մասին Մոսկվայում ընթացող ԱՊՀ երկրների անվտանգության խորհուրդների քարտուղարների հանդիպմանը հայտարարել է ՀԱՊԿ գլխավոր քարտուղար Իմանգալի Տասմագամբետովը, գրում է ՏԱՍՍ-ը։
«Խոսելով Հարավային Կովկասում ստեղծված իրավիճակի մասին՝ ուզում եմ ընդգծել, որ ՀԱՊԿ որոշման նախագիծը, որն ուղղված էր տարածաշրջանում իրավիճակը լիցքաթափելուն, և որը, ցավոք, չընդունվեց անցյալ տարվա նոյեմբերին ՀԱՊԿ խորհրդի նիստում, մնում է ուժի մեջ, եթե ձեռք բերվի կոնսենսուս»,- ասել է նա։
Պաշտոնյան նշել է, որ ՀԱՊԿ պատասխանատվության գոտու հարավային սահմաններում պահպանվում է ահաբեկչական գործունեության, անօրինական միգրացիայի, զենքի և թմրամիջոցների ապօրինի շրջանառության վտանգը։
«Ահաբեկչական և ծայրահեղական տարրերի ներթափանցումը կապված է ոչ միայն Աֆղանստանում ստեղծված ծայրահեղ ծանր իրավիճակի, այլև Աֆղանստանին սահմանակից շրջաններում կայունության հետ»,- հավելել է ՀԱՊԿ գլխավոր քարտուղարը՝ հավելելով, որ այս ամենն ավելի է արդիականացնում Տաջիկստան-Աֆղանստան սահմանի հատվածի ուժեղացման՝ ՀԱՊԿ թիրախային միջպետական ծրագրի աշխատանքն օպերատիվ կերպով ավարտելու խնդիրը։
Գլխավոր քարտուղարը նաև հիշեցրել է, որ ՀԱՊԿ-ն ունի հակամարտությունների աստիճանական կարգավորման դրական օրինակներ, մասնավորապես, այն, որ Տաջիկստանի ու Ղրղզստանի միջև կոնֆլիկտային իրավիճակն աստիճանաբար լուծվում է։
Էմմա Չոբանյան
