06.08.2026 | 00:46
«Մուլտի գրուպ» կոնցեռնի նախկին տնօրեն Սեդրակ Առուստամյանը 2 ամսով կալանավորվեց
Քաղաքաշինության կոմիտեում քննարկվել են ապահովագրության մեխանիզմների կիրառման հնարավորությունները
07.11.2023 | 18:10
Քաղաքաշինության կոմիտեում տեղի է ունեցել հանդիպում Կենտրոնական բանկի և ապահովագրական ընկերությունների ներկայացուցիչների հետ։ Քննարկվել են քաղաքաշինության բնագավառի լիցենզավորվող գործունեություններում ապահովագրության ներդրման հնարավորությունները․ տեղեկացնում են ՀՀ քաղաքաշինության կոմիտեից։
Քաղաքաշինության կոմիտեի նախագահի առաջին տեղակալ Դավիթ Գրիգորյանը տեղեկացրել է քաղաքաշինության ոլորտի կազմակերպությունների լիցենզավորման և մասնագետների հավաստագրման գործընթացներում իրականացված արմատական փոփոխություների մասին, որոնք գործելու են այս տարվա դեկտեմբերի 17-ից։
Զուգահեռաբար շարունակվելու է ենթաօրենսդրական ակտերի մշակումը, որոնց շրջանակում դիտարկվում է նաև քաղաքաշինության բնագավառում իրականացվող գործունեության կանոնակարգման նպատակով ապահովագրության մեխանիզմի կիրառումը։ Ապահովագրությունը պետք է լինի օժանդակող գործիք քաղաքաշինության բնագավառում որակյալ արդյունք ստանալու համար, միաժամանակ չպետք է խոչընդոտներ ստեղծի գործող կազմակերպությունների և ոլորտ նոր մուտք գործող ընկերությունների համար։ Ներկայում շինարարական մեծածավալ ծրագրերի պայմաններում կոմիտեն՝ որպես քաղաքաշինության բնագավառի լիազոր մարմին, շահագրգռված է հնարավորինս նպաստավոր պայմաններ ստեղծել ոլորտի ներկայացուցիչների համար,-ընդգծել է Դավիթ Գրիգորյանը՝ անդրադառնալով շինարարական ծրագրերի ընթացքում ծագող խնդիրներին։
Ապահովագրական ընկերությունների ներկայացուցիչների հետ քննարկվել են ապահովագրման հնարավոր մի քանի տարբերակներ: Դիտարկվել են արդեն իսկ իրականացվող ապահովագրության տեսակները, որոնք հիմնականում վերաբերում են մասնագիտական գործունեությունների ապահովագրմանը: Ապահովագրական ծառայությունների մատուցմամբ զբաղվող մասնագետները ներկայացրել են նաև այլ երկրներում շինարարական աշխատանքների ապահովագրման հետ կապված օրինակներ։ Միաժամանակ հաշվի առնելով ոլորտային յուրահատկությունը՝ որոշվել է առավել մանրամասն ուսումնասիրել արտերկրի փորձը և Հայաստանում քաղաքաշինական գործունեության վերաբերյալ վիճակագրական տվյալների համադրությամբ ուրվագծել ապահովագրության խելամիտ տարբերակներ։
Կենտրոնական բանկի գործընկերների անմիջական ներգրավմամբ և մասնագիտական ուղղորդմամբ կոմիտեն շարունակելու է ապահովագրության մեխանիզմների վերաբերյալ քննարկումները:
