23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
Ռուս զինվորականները Վրաստանի քաղաքացու են գնդակահարել
Քաղաքականություն
07.11.2023 | 12:22
Նոյեմբերի 6-ին ռուս զինվորականները կրակել են Վրաստանի քաղաքացիների ուղղությամբ․ միջադեպը տեղի է ունեցել Գորիի Կիրբալի գյուղի մոտ՝ Վրաստանի և ինքնահռչակ Հարավային Օսիայի միջև բաժանարար գծի հատվածում, գրում է DW-ի ռուսական ծառայությունը։ Զոհվել է Վրաստանի մեկ քաղաքացի։ Ըստ Վրաստանի Պետական անվտանգության ծառայության՝ դեպքը տեղի է ունեցել «տեղի բնակչին ապօրինի ձերբակալելու փորձի ժամանակ, մեկ այլ անձ ապօրինի բերման է ենթարկվել»։
Ըստ տեղի ԶԼՄ-ների՝ մահացածը 58-ամյա Թամազ Գինթուրին է, ձերբակալվածը՝ 35-ամյա Լևան Դոդիաշվիլին, որը, հնարավոր է, վիրավորվել է և այժմ գտնվում է ինքնահռչակ Հարավային Օսիա մայրաքաղաք Ցխինվալի քննչական մեկուսարանում։ Վրացական «Նովոստի Գրուզիա»-ի տվյալներով ևս երկու բնակիչ անհետ կորել է։
Վրաստանի վարչապետ Իրակլի Ղարիբաշվիլին կատարվածն անվանել է «սարսափելի միջադեպ» և ցավակցություն հայտնել մահացածի ընտանիքի անդամներին և հարազատներին։
«Մենք կոչ ենք անում միջազգային հանրությանը գնահատել տեղի ունեցածը և արձագանքել դրան»,- ասվում է Վրաստանի կառավարության ղեկավարի հայտարարության մեջ։
Վրաստանի նախագահ Սալոմե Զուրաբիշվիլին միջազգային հանրությանը կոչ է արել «անվերապահորեն դատապարտել Ռուսաստանի գործողությունները, որոնք բացահայտ և անամոթաբար խախտում են բոլոր միջազգային նորմերը»։
Ինչպես նշում է DW-ն, ռուս զինվորականների կողմից կրակ բացելու պատճառ կարող էր լինել տեղի բնակիչների մոտենալը Վրաստանի և ինքնահռչակ Հարավային Օսիայի բաժանարար գծին կամ այն հատելը։
