18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
Քըլըչդարօղլուն հեռացավ․ Թուրքիայի գլխավոր ընդդիմադիր կուսակցությունը նոր նախագահ ունի
Քաղաքականություն
06.11.2023 | 16:24
Թուրքիայի գլխավոր ընդդիմադիր Ժողովրդահանրապետական կուսակցության (CHP) առաջնորդ, 74-ամյա Քեմալ Քըլըչդարօղլուն նոյեմբերի 5-ին կուսակցության համագումարում անցկացված ընտրություններում պարտվել է 49-ամյա Օզգյուր Օզելին։
CHP-ի խորհրդարանական խմբի նախագահ Օզելը ստացել է 812 ձայն, մինչդեռ Քըլըչդարօղլուն համագումարի երկրորդ փուլում մնացել է 536 ձայնով, որը վերջ է տալիս կուսակցության ղեկավարի պաշտոնում Քըլըչդարօղլուի 13-ամյա կառավարմանը։ Նրա հետ կապված կուսակցության ներսում դժգոհություններ էին հասունացել նախագահական ընտրություններում պարտության և խորհրդարանական ընտրություններում համեմատաբար վատ արդյունքների համար։
Օզելը նախկին դեղագործ է, առաջին անգամ պատգամավոր է ընտրվել 2011 թվականին: Նա ղեկավարելու է կուսակցությունը մարտին կայանալիք տեղական ընտրություններում՝ փորձելով պահպանել այն քաղաքների ղեկավարումը, որոնցում ընդդիմությունը հաղթել էր նախորդ ընտրություններում, այդ թվում՝ մայրաքաղաք Անկարան ու Ստամբուլը։
Իր հաղթանակի կապակցությամբ ելույթում Օզելն ասել է, որ անմիջապես կմոբիլիզացնի կուսակցությունը՝ մայիսի ընտրություններում պարտության «մեծ տխրությունը փոխհատուցելու համար»:
«Մինչև այսօր պատվով եմ կրել մեր Մեծ առաջնորդ Աթաթուրքի ժառանգությունը: Այսօր ես հրաժեշտ եմ տալիս այս պաշտոնին մեր համագումարի պատվիրակների ընդունած որոշմամբ: Ցանկանում եմ շնորհակալություն հայտնել բոլոր նրանց, ովքեր աջակցել են: Շնորհավորում եմ մեր նոր նախագահ Օզգյուր Օզելին և մաղթում հաջողություններ»,- իր հերթին սոցցանցերում գրել է Քըլըչդարօղլուն։
Հիշեցնենք, որ Քեմալ Քըլըչդարօղլուն նախագահական ընտրություններում պարտվել է Ռեջեփ Թայիփ Էրդողանին՝ մայիսի 28-ին կայացած ընտրությունների երկրորդ փուլում ստանալով ձայների 47,82 տոկոսը։
Էմմա Չոբանյան
