Տղամարդ դատավորները պարտավոր չեն լինի սափրված ներկայանալ աշխատանքի․ ԲԴԽ-ն լրամշակել է որոշման նախագիծը

Բարձրագույն դատական խորհուրդը պարզաբանում է տարածել Factor.am-ի հոկտեմբերի 24-ի հրապարակման առթիվ, համաձայն որի՝ դատավորների քննարկմանն է ուղարկել որոշման նախագիծ, ըստ որի՝ տղամարդ դատավորները պետք է սափրված կամ դեմքի խնամված մազածածկույթով ներկայանան աշխատանքի։

«Մամուլում տարածված և շահարկված այն տեղեկություններին ի պատասխան, թե Բարձրագույն դատական խորհրդի կողմից շրջանառվել է նախագիծ «տղամարդ դատավորների սափրված լինելու մասին» պարզաբանենք հետևյալը: 

Մի խումբ դատավորների կողմից մշակվել և Բարձրագույն դատական խորհրդին է ներկայացվել դատավորների ներքին կարգապահական կանոնների վերաբերյալ նախագիծ՝ որն ուղղված է դատարանների աշխատանքի արդյունավետության բարձրացմանը, դատավորների ծառայողական պարտականությունների բարեխիղճ կատարմանը և դատավորների աշխատանքային կարգապահության ապահովմանը։ 

Հատկանշական է, որ նախագիծը դեռևս գտնվում է ամենավաղ նախնական քննարկումների, առաջարկների, դիտարկումների և վերամշակման փուլում: Դատական դեպարտամենտի, դատավորիների և ԲԴԽ անդամների կողմից քննարկումների ավարտից, նախագծի վերաբերյալ առաջարկությունների, դիտարկումերի հավաքագրումից և դրանցից ընդունելիներն իրացնելուց հետո՝ այն կստանա արդեն վերջնական, մշակված տեսք, որից հետո արդեն ԲԴԽ-ի կողմից կքննարկվի այն ընդունելու հարցը:

Թյուրըմբռնումներից խուսափելու նպատակով՝ ստորև ձեզ ենք ներկայացնում դատավորների շրջանում շրջանառված նախագիծն այս պահի լրամշակմամբ, որտեղ բացակայում են մի քանի լրագրողներին չափազանց անհանգստացրած՝ սափրվելու սուր թեման»,- ասված է ԲԴԽ հայտարարության մեջ, որին կցված է նաև որոշման լրամշակված տարբերակը։

Հիշեցնենք, որ Factor.am-ի երեկվա հրապարակման մեջ գրել էինք, որ Բարձրագույն դատական խորհուրդը շրջանառության մեջ է դրել դատավորների ներքին աշխատանքային կարգապահական կանոններ, որոնց մի մասը վերաբերում է նրան, թե դատավորներն ինչ տեսքով պետք է ներկայանան դատարան։ 

 «Դատավորները պարտավոր են աշխատանքի ներկայանալ դասական ոճի կամ գործնական ոճի (Business և Business casual) հագուստով, տղամարդիկ՝ սափրված կամ դեմքի խնամված մազածածկով»,-  գրված է եղել որոշման նախագծում։  Հայտնել ենք նաև, որ որոշման վերաբերյալ դատավորները կարող էին իրենց կարծիքը հայտնել։

Արաքս Մամուլյան