15.11.2024 | 23:30
Թուրքիայի նախագահականը հերքում է Էրդողանի և նրա դաշնակից Բահչելիի միջև տարաձայնությունները քրդական հարցի շուրջ
«Մենք չենք ընդունի այն, ինչ Ադրբեջանի համար անընդունելի է». Չավուշօղլու
Քաղաքականություն
25.07.2018 | 13:23
Պաշտոնական այցով Բաքվում գտնվող Թուրքիայի արտգործնախարար Մևլութ Չավուշօղլուն հանդիպել է ադրբեջանցի պաշտոնակից Էլմար Մամեդյարովի հետ:
Հանդիպումից հետո կազմակերպված համատեղ մամուլի ասուլիսի ընթացքում Չավուշօղլուն ի թիվս բազմաթիվ հարցերի, խոսել է նաև ղարաբաղյան հակամարտության մասին։
Նա հայտնել, որ Բրյուսելում՝ ՆԱՏՕ-ի գագաթնաժողովի շրջանակներում հանդիպել է Հայաստանի արտգործնախարար Զոհրապ Մնացականյանի հետ և վերջինիս շնորհավորել արտգործնախարար դառնալու առթիվ։
«Ի սկզբանե պայմանավորված հանդիպում չէր, սակայն հանդիպելիս քաղաքավարության և մարդկային տեսանկյունից քայլեր են, որ անհրաժեշտ է անել»,-ասել է Չավուշօղլուն։
Վերջինս ընդգծել է, որ ՀՀ ԱԳ նախարարին շնորհավորելը որևէ կերպ չի փոխում Թուրքիայի վերաբերմունքն ու մոտեցումը Ադրբեջանի «օկուպացված հողերի» հարցում:
«Մեր չափանիշներն այս հարցում հայտնի են։ Այն, ինչ Ադրբեջանը կընդունի, մենք էլ կընդունենք, իսկ այն, ինչ չի ընդունի, Թուրքիան նույնպես չի ընդունի»,-եզրափակել է Թուրքիայի արտաքին գործերի նախարարը։
