18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
Լևոն Քոչարյանի կալանքի ժամկետը երկարացնելու միջնորդությունը մակագրվել է Մասիս Մելքոնյանին
Քաղաքականություն
17.10.2023 | 18:37
Հայաստանի երկրորդ նախագահ Ռոբերտ Քոչարյանի որդու՝ Լևոն Քոչարյանի կալանքի ժամկետը երկարացնելու միջնորդությունը մակագրվել է Երևանի ընդհանուր իրավասության քրեական դատարանի դատավոր Մասիս Մելքոնյանին։ Այս մասին Factor.am-ի հարցին ի պատասխան ասաց Քոչարյանի պաշտպաններից Էրիկ Ալեքսանյանը։ Մելքոնյանն այն դատավորն է, որը նաև Լևոն Քոչարյանին մեկ ամսով կալանավորելու որոշումն է կայացրել։ Կալանքի ժամկետը երկարացնելու գործով դատական նիստը նշանակվել է վաղը՝ հոկտեմբերի 18-ին։
Հիշեցնենք, որ Լևոն Քոչարյանը մեղադրվում է Նիկոլ Փաշինյանի հրաժարականի պահանջով սեպտեմբերի 19-ից մեկնարկած բողոքի գործողությունների ժամանակ իշխանության ներկայացուցիչ հանդիսացող ոստիկանների նկատմամբ բռնություն գործադրելու մեջ։ Նա մեղադրանքը չի ընդունում, ավելին, պնդում է, որ ոստիկաններն են իր նկատմամբ բռնություն գործադրել։ Քննչական կոմիտեում նաև Քոչարյանի այս հաղորդման առթիվ է գործ քննվում՝ խոշտանգման հոդվածով։
Քոչարյանն անազատության մեջ է սեպտեմբերի 22-ից, այսինքն՝ հոկտեմբերի 22-ին լրանում է նրա կալանքի մեկամսյա ժամկետը։ Կալանքի ժամկետը երկարացնելու միջնորդությունը դատարան է մուտքագրվել երեկ՝ հոկտեմբերի 16-ին, երբ, ըստ court.am կայքի, հերթապահ դատարանը եղել է Երևանի դատարանի Կենտրոնի նստավայրը։ Միջնորդություն, սակայն մակագրվել է Մելքոնյանին, որը աշխատում է ոչ թե Կենտրոնի, այլ Նոր Նորքի նստավայրում։
Նշենք, որ Քոչարյանի պաշտպանները նրան 1 ամսով կալանավորելու որոշման դեմ բողոք են տարել Վերաքննիչ դատարան, որը մակագրվել է դատավոր Մհեր Արղամանյանին։ Վերջինս այս բողոքի գործով որոշումը պետք է հրապարակ հոկտեմբերի 19-ին։ Թե որքան կտևի առաջին ատյանում միջնորդության քննությունը, և որ դատարանն առաջինը որոշում կհրապարակի, դեռևս պարզ չէ։
Արաքս Մամուլյան
