Փաստաբան Մուշեղ Շուշանյանը կալանավորվեց

Փաստաբան, «Սասնա Ծռեր» խմբավորման գործով պաշտպան Մուշեղ Շուշանյանը կալանավորվեց։ Երևանի ընդհանուր իրավասության դատարանը որոշում կայացրեց բավարարել նախաքննական մարմնի միջնորդությունը և խափանման միջոց ընտրել կալանքը։

Հիշեցնենք՝ Քննչական կոմիտեն այսօր հաղորդագրություն էր տարածել՝ նշելով, որ 2023թ. մայիսի 9-ին «Ազգային ժողովրդավարական բևեռ» յութուբյան էջում զետեղվել է «Նիկոլի ֆիզիկական ոչնչացումը միանգամայն արդարացված է». Մուշեղ Շուշանյան» վերտառությամբ տեսանյութ, որի ընթացքում Մ.Շուշանյանը ՀՀ վարչապետի նկատմամբ, քաղաքական հայացքներով պայմանավորված, հնչեցրել է բռնություն գործադրելու հրապարակային կոչեր, արդարացրել նմանօրինակ գործողությունները։

Ըստ ՔԿ-ի՝ շարունակելով իր հանցավոր՝ բռնություն գործադրելու հրապարակային կոչեր հնչեցնելու, բռնությունը հրապարակայնորեն արդարացնելու և քարոզելու, ինչպես նաև՝ այդ նպատակով նյութեր տարածելու գործունեությունը, իր ֆեյսբուքյան «Mushegh Shushanyan» անվամբ գրանցված էջում, Մ.Շուշանյանն այսօրինակ բովանդակությամբ մի քանի գրառում է կատարել:

«Նկատի ունենալով, որ վերոնշյալ գրառումներում առերևույթ առկա են հանցագործության հատկանիշներ՝ ՀՀ քննչական կոմիտեի ԵՔՔՎ Ավան և Նոր Նորք վարչական շրջանների քննչական բաժնում նախաձեռնվել են քրեական վարույթներ, որոնք օբյեկտիվ և համակողմանի քննություն կատարելու նպատակով միացվել են մեկ վարույթում: Մ.Շուշանյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 330-րդ հոդվածի 2-րդ մասի 3-րդ կետի հատկանիշներով»,- նշվում է հաղորդագրության մեջ։