07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
Մենք շատ մարդկանց ենք կորցրել․ երջանիկ ավարտ չի լինի. Զելենսկին՝ հակահարձակման մասին
Քաղաքականություն
11.09.2023 | 17:21
Ուկրաինայի նախագահ Վլադիմիր Զելենսկին CNN-ին տված հարցազրույցում հերքել է ՌԴ նախագահ Վլադիմիր Պուտինի հետ փոխզիջման հնարավորությունը՝ հայտարարելով, որ պատերազմը «երջանիկ ավարտ» չի ունենա։
Պատասխանելով խաղաղ բանակցությունների և Մոսկվայի հետ փոխզիջման հասնելու մասին կոչերին՝ Զելենսկին ասել է, որ Ռուսաստանն ինքը պատրաստ չէ փոխզիջումների։ Նա այլ երկրների օրինակներ է բերել, որոնք տուժել են ՌԴ ռազմական ագրեսիայից։
«Դուք Պուտինի կողմից այլ հարցերում փոխզիջում տեսե՞լ եք։ Վրաստանի, Մոլդովայի հետ»,- նշել է նա։
Ուկրաինայի նախագահը նաև հիշեցրել է «Վագներ» մասնավոր ռազմականացված խմբավորման հիմնադիր Եվգենի Պրիգոժինի մահը ապստամբությունից երկու ամիս անց։ Զելենսկիի խոսքով՝ Պրիգոժինին սպանել են՝ չնայած նրան տրված խոստումներին ու անվտանգության երաշխիքներին։
«Երբ ուզում ես որևէ մեկի հետ փոխզիջման գնալ կամ երկխոսել, չես կարող դա անել ստախոսի հետ»,- ասել է նա։
«Պուտինը ցանկանում է տիրել մեր ամբողջ երկրին, քանդել մեր ընտանիքներն ու տները: Նա հասկանում է, որ Ուկրաինան երբեք չի նահանջի, չի լքի իր հողը։ Մենք դա երբեք չենք անի։ Ահա թե ինչու է նա կարծում, որ պետք է սպանի մեզ»,- հավելել է Ուկրաինայի նախագահը։
Մեկնաբանելով Ուկրաինայի հակահարձակումը՝ Զելենսկին ասել է. «Մենք բոլորս ցանկանում ենք հասնել հաջողության և ունենալ երջանիկ ավարտ: Բայց սա երջանիկ ավարտով ֆիլմ չէ, մենք երջանիկ ավարտ չենք ունենա։ Մենք շատ մարդկանց ենք կորցրել, երջանիկ ավարտ չի լինի։ Մենք պետք է դա ընդունենք»:
