Քաղաքականություն
10.09.2023 | 13:57
Հայաստանի ԱԺ նախագահի հայտարարությունը, թե Ռուսաստանը Լեռնային Ղարաբաղը «հանձնել է» Ադրբեջանին, չի համապատասխանում իրականությանը: Առավել ոչ կոռեկտ և անազնիվ հայտարարություն դժվար է պատկերացնել։ Այս մասին հայտարարել է ՌԴ ԱԳ նախարար Սերգեյ Լավրովը՝ Նյու Դելիում կայացած G20-ի գագաթնաժողովին հաջորդած մամուլի ասուլիսում։
Լավրովը նաև նշել է, որ Հայաստանի և ԱՄՆ-ի զորավարժությունները տարօրինակ են թվում ՝ հաշվի առնելով, որ Երևանը հրաժարվում է ՀԱՊԿ-ի շրջանակներում զորավարժություններից։
«Իհարկե, ոչ մի լավ բան չկա նրանում, որ ՆԱՏՕ-ի ագրեսիվ երկիրը փորձում է ներթափանցել Անդրկովկաս։ Եվ ես չեմ կարծում, որ դա ինչ-որ մեկի համար լավ է, այդ թվում ՝ հենց Հայաստանի։ Հայկական ղեկավարության գործողությունները ափսոսանք են առաջացնում»,- նշել է ՌԴ ԱԳ նախարարը։
Հիշեցնենք՝ օգոստոսի 16-ին Արցախի նախագահին կից հակաճգնաճամային խորհրդի նախագահ Տիգրան Պետրոսյանը հրապարակել էր 14 կետից բաղկացած մի փաստաթղթի նախագիծ, որը, ըստ Պետրոսյանի, ՌԴ ԱԳ նախարար Սերգեյ Լավրովն առաջարկել է Երևանին ու Բաքվին։ Նախագծում Կրեմլն առաջարկել էր, թե ինչպես պետք է արցախահայերն ապրեն Ադրբեջանի կազմում։
«Խորհրդային Ադրբեջանի նախկին ինքնավար մարզ Լեռնային Ղարաբաղի տարածքում հայ բնակչության իրավունքների և անվտանգության ապահովման հիմնարար սկզբունքներն ու պարամետրերը Ադրբեջանի օրենսդրության համաձայն» վերնագրով նախագծում նշվում է, որ հայ բնակչությունը պետք է հավասար իրավական պաշտպանություն ունենա և խտրականության չենթարկվի ո՛չ լեզվի, ո՛չ ազգային, ո՛չ կրոնական հիմքով, պետք է համամասնորեն մաս կազմի Ադրբեջանի օրենսդիր, գործադիր ու դատական իշխանությանը, այդ թվում՝ Ադրբեջանի դատախազությունում և ոստիկանությունում, մասնակցի հայ բնակչությանը վերաբերող որոշումների կայացմանը:
