ԱՄՆ-ը մանրամասներ է հայտնել Հայաստանում անցկացվելիք հայ-ամերիկյան զորավարժություններից

Եվրոպայում և Աֆրիկայում ԱՄՆ հրամանատարությունը մանրամասներ է ներկայացրել «ԱՐԾԻՎ ԳՈՐԾԸՆԿԵՐ-2023» հայ-ամերիկյան համատեղ զորավարժություններից։

Մասնավորապես, հաղորդվում է, որ 85 ամերիկացի զինվորականներ 175 հայ զինվորականների հետ վարժանքներ են անցկացնելու սեպտեմբերի 11-20-ը Հայաստանում անցկացվող Eagle Partner խաղաղապահ զորավարժությունների ընթացքում: 1-ին բրիգադի, 101-րդ օդադեսանտային դիվիզիայի և Կանզասի ազգային գվարդիայի զինծառայողները, Հայաստանի 12-րդ խաղաղապահ բրիգադի զինվորականներն ուսումնավարժանքներն անցկացնելու են Երևանի մերձակայքում գտնվող ուսումնական տարածքներում։

«Eagle Partner-ը կենսական հնարավորություն է մեր երկու երկրների զինվորականների համար՝ մարտավարական մակարդակում նոր հարաբերություններ կառուցելու և խաղաղապահ գործողությունների փոխգործունակությունը մեծացնելու համար։ Այն նաև հիմնված է Հայաստանի հետ Կանզասի ազգային գվարդիայի 20-ամյա հարաբերությունների վրա»,- ասել է  ԱՄՆ բանակի Եվրոպայի և Աֆրիկայի հրամանատարության ներկայացուցիչ, գնդապետ Մարտին Օ’Դոնելը։

Նշվում է, որ Պաշտպանության դեպարտամենտի Պետական գործընկերության ծրագրի շրջանակում Կանզասի ազգային գվարդիան Հայաստանի հետ պետական գործընկերություն ունի 2003 թվականից:

ՀՀ ՊՆ-ն ավելի վաղ հայտնել էր, որ սեպտեմբերի 11-20-ը  Միջազգային խաղաղապահ առաքելություններում մասնակցության նախապատրաստման շրջանակում ՊՆ խաղաղապահ բրիգադի «Զառ» ուսումնական կենտրոնում և ՊՆ N ուսումնական կենտրոնում անցկացվելու է «ԱՐԾԻՎ ԳՈՐԾԸՆԿԵՐ-2023» հայ-ամերիկյան համատեղ զորավարժությունը։

Էմմա Չոբանյան