Քաղաքականություն
08.09.2023 | 15:30
Բաքվում տեղի է ունեցել Թյուրքական պետությունների կազմակերպության աղետների կառավարման և արտակարգ իրավիճակների հարցերով նախարարների երկրորդ հանդիպումը։ Նախարարներին ընդունել է նաև Ադրբեջանի նախագահ Իլհամ Ալիևը: Հանդիպմանը մասնակցող երկրների թվում է նաև Հյուսիսային Կիպրոսը։
«Այսօր առաջին անգամ մեր շարքերում ներկա է Հյուսիսային Կիպրոսի ներկայացուցիչը։ Ես ուզում եմ հատկապես ողջունել Հյուսիսային Կիպրոսի մեր թյուրք եղբայրներին։ Նախարարն այստեղ ներկայացված է դիտորդի կարգավիճակով, բայց, միաժամանակ, սեփական դրոշով։ Իհարկե, մեր միջոցառմանը պետք է և կծածանվի նաև Հյուսիսային Կիպրոսի դրոշը»,-հայտարարել է Ալիևը։
Ադրբեջանի նախագահի այս հայտարարությունները հաշվի առնելով փորձագետները չեն բացառում Բաքվի կողմից Հյուսիսային Կիպրոսի պաշտոնական ճանաչումը։ Նշենք, որ Հյուսիսային Կիպրոսի ինքնահռչակ հանրապետությունը ճանաչված է միայն Անկարայի կողմից։
Հիշեցնենք՝ Արցախյան 44-օրյա պատերազմից հետո Բաքուն բավական սերտ կապեր է հաստատել Թուրքիայի կողմից վերահսկվող Հյուսիսային Կիպրոսի հետ։ Նախորդ տարի էլ թուրքական Քոնիա քաղաքում տեղի էր ունեցել Իլհամ Ալիևի և Հյուսիսային Կիպրոսի ինքնահռչակ հանրապետության նախագահ Էրսին Թաթարի հանդիպումը, իսկ 2021-ին Ադրբեջանի խորհրդարանական պատվիրակությունն առաջին անգամ այցելել էր Հյուսիսային Կիպրոս։
Էմմա Չոբանյան
