Զախարովան պատասխանել է Ալեն Սիմոնյանի՝ «ինչ-որ քարտուղարուհի» արտահայտությանը

ՌԴ ԱԳՆ պաշտոնական ներկայացուցիչ Մարիա Զախարովան աջակցություն է հայտնել բոլոր քարտուղարներին՝ ի պատասխան ՀՀ ԱԺ նախագահ Ալեն Սիմոնյանի հայտարարության, որը Զախարովային «ինչ-որ քարտուղարուհի» էր անվանել։ Զախարովան գրառում է արել իր Տելեգրամ-ալիքում, գրում է ՏԱՍՍ-ը։

«Դժվար է վիճել, որ մակարդակի հետ կապված ակնհայտ խնդիրներ կան։ Եվ ես ուզում եմ աջակցության խոսքեր ասել մոլորակի բոլոր «քարտուղարուհիներին»: Ընկերուհինե՛ր, ձեր աշխատանքն է նույնիսկ ամենաբարձր ղեկավարի հաջողության գրավականը։ Առանց ձեր ամենօրյա տքնաջան աշխատանքի, այդ թվում՝ ժամանակացույցի, հանդիպումների կազմակերպման, փաստաթղթերի հետ աշխատանքի, զանգերի ստացման և միլիոնավոր տարբեր հոգսերի, ամեն ինչ կփոշիանա: Մի՛ նեղացեք, այս մարդը, համոզված եմ, առանց մտածելու դուրս է տվել։ Նրա ասածի հետ կապված ձեր վերաբերմունքը մի՛ տարածեք հայ ժողովրդի վրա, որն իմաստուն է, բազմաչարչար ու սիրառատ»,- նշել է ՌԴ ԱԳՆ պաշտոնական ներկայացուցիչը։

Հիշեցնենք՝ Ալեն Սիմոնյանը հայտարարել էր, որ չի ցանկանում արձագանքել Զախարովայի՝ ավելի վաղ ճեպազրույցում արված հայտարարություններին։

«Ես չեմ պատրաստվում արձագանքել ինչ-որ գերատեսչության ինչ-որ քարտուղարուհու, որը, կարծում եմ, իմ մակարդակը չէ: ԱԳՆ կա դրա համար, արտաքին բաժին կա, թող իրենք արձագանքեն: Ես չեմ համարում, որ ես ու ձեր նշած մարմնի բաժնի պետի տեղակալը նույն մարդն ենք, որ ես խոսեմ: Թող ինքն իր դարդերով տապակվի»,- ասել էր ՀՀ ԱԺ նախագահը։

Էմմա Չոբանյան