Բաքուն զինվում է․ որքանով է իրական նոր պատերազմի սպառնալիքը․ ՏԵՍԱՆՅՈՒԹ

Ադրբեջանական մեդիա տիրույթում նոր պատերազմի կանխատեսումներ են հնչում՝ անգամ հավանական ժամանակահատված է մատնանշվում։ Նախագահական ապարատի նախկին պաշտոնյա Էլդար Նամազովը, որը եղել է Հեյդար Ալիևի խորհրդականը, Թվիթերում գրում է՝ Ադրբեջանը սեպտեմբեր-հոկտեմբերին պատրաստվում է փոքր մասշտաբի ռազմական գործողության, իսկ 2024-ին՝ մեծամասշտաբ գործողությունների։

Ադրբեջանական կողմի վերջին սադրանքը չորս օր առաջ էր՝ սեպտեմբերի 1-ին։ Հակառակորդը Սոթքի դիրքերի ուղղությամբ ականանետ և ԱԹՍ-ներ կիրառեց, բայց դիրքային առաջխաղացման չհասավ։ Հայկական կողմից զոհվեց 3, վիրավորվեց՝ 2 զինծառայող։

Ռազմական փորձագետ Տիգրան Աբրահամյանի խոսքով՝ ադրբեջանական կողմը ոչ միայն Գեղարքունիքում, այլև Արարատի մարզի սահմանային հատվածում է ուժեր կուտակում։

Այս օրերին նաև ակտիվացել են ադրբեջանական բեռնատար ինքնաթիռների թռիչքները դեպի իսրայելական «Օվդա» ավիաբազա, հայտնում է «Հետք»-ը։ Լրատվամիջոցի փոխանցմամբ՝ սա Իսրայելի միակ ավիաբազան է, որի միջոցով օդային ճանապարհով արտահանվում է պայթուցիկ ռազմամթերք: 2016 թվականից մինչև 2023-ի մարտ ադրբեջանական բեռնատար ինքնաթիռներն առնվազն 92 անգամ վայրէջք են կատարել «Օվդա»-ում, ապա ուղղություն վերցրել դեպի Ադրբեջան: Վերջին տարիներին Իսրայելն այս երկրի գլխավոր ռազմական մատակարարն է: 2023 թվականի ապրիլ-հունիս ամիսներին տեղի է ունեցել ևս 4 թռիչք։

Ազգային անվտանգության և ռազմական հարցերով փորձագետ Հրաչյա Արզումանյանի դիտարկմամբ՝ Բաքուն նոյեմբերի 9-ի հայտարարությունից հետո մշտապես ագրեսիվ գործելաոճ է դրսևորել։

Տիգրան Աբրահամյանն ուշադրություն է հրավիրում այն հանգամանքի վրա, որ հայ-ադրբեջանական բանակցություններում առաջխաղացում չկա, ինչին զուգահեռ էլ աճում է ադրբեջանական կողմից հնչող կոշտ հռետորաբանությունը։

Հիշեցնենք՝ Իլհամ Ալիևն Արցախի օկուպացված տարածքներից պարբերաբար սպառնում է ՀՀ-ին՝ հայտարարելով, որ զինվում են հեռահար զինատեսակներով։ Ավելի վաղ հայտնի էր դարձել, որ Բաքուն պաշտպանական ոլորտի ծախսերը մեծացրել է 16 տոկոսով՝ հասցնելով 3,1 մլրդ դոլարի։

Հրաչյա Արզումանյանը, սակայն, կարծում է՝ հայկական կողմը պատերազմից հետո որոշակի առումով վերականգնվել է։

Սեպտեմբերի 1-ի դիրքային մարտերից հետո ՀՀ Պաշտպանության նախարարությունը սահմանային լարումների մասին հաղորդագրություններ չի տարածել, սակայն պարբերաբար հերքում է ադրբեջանական կողմի տարածած ապատեղեկատվությունները։

Մանրամասները՝ տեսանյութում։

Նարեկ Կիրակոսյան