Հուսով եմ, որ սա մեր երկար սպասված անկախ արտաքին քաղաքականության ձևավորման սկիզբն է․ Ռուբեն Կարապետյան

ՀՀ արտակարգ եւ լիազոր դեսպան Ռուբեն Կարապետյանն իր ֆեյսբուքյան էջում գրել է․ «Ուրախ եմ, որ Հայաստանը, կարծես թե, սկսում է «կենտրոնանալ» և բարձրաձայն հնչեցնել հայկական շահերն ու վարել ինքնուրույն քաղաքականություն: Կարծում եմ՝ ՀՀ վարչապետ Ն.Փաշինյանի առաջին այցը եվրոպական մայրցամաք, այն էլ Հյուսիսատլանտյան դաշինքի շրջանակներում, ազդարարեց հենց վերոհիշյալը: Առաջին անգամ ՀՀ անկախությունից
Ի վեր Արևմուտքի հետ մեր համագործակցության մեջ որակապես նոր մոտեցումներ հնչեցվեցին ու շեշտադրումներ արվեցին:
Մինչ թավշյա հեղափոխությունը Երևանի հարաբերությունները ԵՄ և ԱՄՆ-ի հետ ավելի շուտ «ուսուցիչ-աշակերտ» փոխհարաբերությունների էին նման, երբ կարգապահ վարքի համար ուսուցիչը տարբեր ձևով խրախուսում էր աշակերտին: Ուսուցչի պարտադրանքով «Ժողովրդավարական» բարեփոխումների ձևական իրականացումը Հայաստանի նախկին իշխանությունների համար Արևմուտքը սիրաշահելու լոկ միջոց էր՝ սուր քննդատությունից խուսափելու, ընտրությունների ժամանակ մեղմ դիրքորոշում ակնկալելու համար:
Ն.Փաշինյանը իր Բրյուսել այցի ընթացքում վերջ դրեց հարաբերությունների այդ արատավոր ձևաչափին: Օդանավակայանում կազմակերպված ճեպազրույցի ընթացքում ՀՀ վարչապետը հստակեցրեց.
1.Հայաստանը Արևմուտքի աջակցության «հայցողի»՝ խնդրողի դերում այլևս հանդես չի գալու…
2.Հայաստանի համար ժողովրդավարությունը արտաքին կողմնորոշում չէ այլ`ժողովրդական պահանջ, սկզբունք և կենսակերպ: Այն որևէ սակարկման առարկա չէ…
2. Հայաստանը վճռական է իրականացնել բարեփոխումները անկախ Արևմուտքի ցանկությունից և օժանդակությունից… 
3.Հայաստանը այսուհետ դատելու է Արևմուտքի գործողությունները ոչ թե վերջինիս հայտարարությունների այլ՝ նրա վարած իրական քաղաքականության հիման վրա, որը պետք է լինի ծանրակշիռ ու էական, ի տարբերություն նախկինում՝ ձևական և անարդյունք օժանդակության…
Սա իմ սրտով էր: Հուսով եմ, որ սա մեր երկար սպասված ԱՆԿԱԽ արտաքին քաղաքականության ձևավորման սկիզբն է»: