Էրդողանի պալատի վրա 1 ժամում ծախսվում է 900 հազար լիրա

Այն դեպքում երբ Թուրքիայի կառավարությունը պահանջում է պետական հաստատություններում խնայողություն անել, թուրքական գլխավոր ընդդիմադիր Ժողովրդահանրապետական կուսակցության (CHP) խորհրդարանական խմբակցության ղեկավար Ալի Մահիր Բաշարըրը ուշադրություն է հրավիրել նախագահական պալատի ծախսերի վրա, գրում է Duvar-ը։

Նա նշել է, որ նախագահ Ռեջեփ Թայիփ Էրդողանի պալատի 1 ժամվա շահագործումն արժե 900,000 լիրա։

«Նախագահական պալատի ընդհանուր ծախսերը 2023 թ-ի առաջին վեց ամիսներին կազմել են 2,1 միլիարդ լիրա, այսինքն՝ օրական 21 միլիոն լիրա, իսկ ժամում՝ 900 հազար լիրա։ Պալատի ծախսերը 1 րոպեի համար կազմում են 15,000 լիրա, որը համապատասխանում է երկու հոգու կենսաթոշակին»,- ասել է Բաշարըրը խորհրդարանում ունեցած ելույթի ժամանակ։

Նա հայտնել է, որ նախագահականի ծախսերը մայիս ամսվա համար կազմել են 316 մլն լիրա, իսկ հունիսին՝ 647 մլն լիրա։

«Դուք (դիմում է կառավարությանը) առաջարկում եք խնայողական միջոցներ, բայց բոլոր մեքենաները պետական հաստատություններում օգտագործվող շատ շքեղ են։ Մեկ ամիս առաջ  նախագահականի հաղորդակցության տնօրինությունը 9 միլիոն լիրայով վարձակալել է 9 մեքենա և միկրոավտոբուս։ Եվ այս բոլոր մեքենաները 2022 թվականի մոդելի են»,-ասել է պատգամավորը։

Նա հավելել է, որ կառավարության պաշտոնյաների շեշտադրումները խնայողության միջոցների մասով  չեն համընկնում իրենց իրական գործողությունների հետ:

«Սրանք իսկապես ամոթալի պատկերներ և ծախսեր են պալատական ռեժիմի, որն ասում է՝ ձգե՛ք գոտիներդ։ Հանրային ինստիտուտների ավտոմեքենաների գնման ծախսերը տարվա առաջին վեց ամիսներին կազմել են 547 մլն լիրա։ Անցյալ տարի այս ցուցանիշը կազմել է 76 մլն լիրա։ Այն աճել է ութ անգամ»,- ասել է Բաշարըրը։

Հավելենք, որ վերջերս Թուրքիայի ֆինանսների նախարար Մեհմեդ Շիմշեքը  շրջաբերական էր ուղարկել բոլոր պետական հաստատություններ՝ նշելով, որ բոլոր ծախսերը, բացառությամբ երկրաշարժից տուժած գոտու, պետք է վերանայվեն և չափից դուրս խնայողությունների մեթոդներ կիրառվեն։

Էմմա Չոբանյան