16.05.2026 | 09:51
«Բավարիան» նոր պայմանագիր է կնքել Մանուել Նոյերի հետ․ ՏԵՍԱՆՅՈՒԹ
«Տրդատ Սարգսյանի անունը փորձել են մաքրել»․ 4 տարի կոմայի մեջ եղած փոխգնդապետի գործն արդյոք կվերաբացվի․ ՏԵՍԱՆՅՈՒԹ
Հասարակություն
28.07.2023 | 20:55
Երեկ Մուրացանի հոսպիտալի վերակենդանացման բաժանմունքում մահացել է Եղեգնաձորում դաժան ծեծի ենթարկված փոխգնդապետ Արա Մխիթարյանը: Նա շուրջ 4 տարի կոմայի մեջ էր։ Փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին՝ Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում. նա հոսպիտալ էր տեղափոխվել փակ գանգուղեղային վնասվածքով, արյունազեղման մեծ օջախով և ուղեղի աջ կիսագնդի տեղաշարժով։ Այնինչ, ավելի վաղ, տեղեկություններ էին շրջանառվում, որ Մխիթարյանն ընդամենը բռնունցքի մեկ հարված է ստացել։
Հարազատները պնդում են՝ փոխգնդապետին ծեծել է այն ժամանակ Վայոց Ձորի մարզպետի պաշտոնը զբաղեցնող Տրդատ Սարգսյանի օգնականը, իսկ միջադեպին ներկա է եղել նաև նախկին մարզպետը։
Միջադեպից երկու շաբաթ անց Սարգսյանը հրաժարականի դիմում ներկայացրեց, թեև պնդում էր, թե ինքը որևէ մասնակցություն չի ունեցել միջադեպին։ Թեև վկաները պնդում էին, որ, այնուամենայնիվ, մասնակից է եղել նաև Տրդատ Սարգսյանը, սակայն Քննչական կոմիտեն չէր շտապում մարզպետի մասնակցության հարցը քննել։
Ի վերջո, դիտավորությամբ անձին ծանր մարմնական վնաս պատճառելու հոդվածով մեղադրյալի աթոռին հայտնվեցին, ապա կալանավորվեցին մարզպետի օգնական Հարություն Գրիգորյանը և նրա եղբայր Զավեն Գրիգորյանը։ Վերջինս գրավի դիմաց ազատ արձակվեց, իսկ ավելի ուշ նրա նկատմամբ նախաքննական մարմնի որոշմամբ քրեական հետապնդումը դադարեցվեց, իսկ Հարություն Գրիգորյանի վերաբերյալ դրվագն անջատվեց և ուղարկվեց դատարան։ 2 տարվա դատաքննությունից հետո Գրիգորյանը դատապարտվեց 5 տարի ազատազրկման։
Դատական գործընթացը, սակայն, այսքանով չի ավարտվել։ Միջադեպին ներկա երեք զինվորականները, որոնք ցուցմունքում նշել էին նախկին մարզպետի և Զավեն Գրիգորյանի ներկայության մասին, սուտ մատնության հոդվածով այս պահին մեղադրյալի աթոռին են։ Ընդդիմադիր պատգամավորը նկատում է՝ գուցե ամեն ինչ այլ լիներ, եթե Տրդատ Սարգսյանը մասնակցություն չունենար դեպքին։
Տրդատ Սարգսյանն ամիսներ առաջ Գլխավոր դատախազին հարց էր ուղղում, թե ինչու ցուցմունք տված այդ զինվորականները կալանքի տակ չեն։
Իրավապաշտպան Ժաննա Ալեքսանյանը պնդում է՝ գործի ամբողջ քննությունն ընթացել է այնպես, որ Տրդատ Սարգսյանի անունը մաքուր պահվի։ Ալեքսանյանն ընդգծում է՝ Նիկոլ Փաշինյանի պաշտոնավարման օրոք դատաիրավական համակարգը որդեգրել է «նախկինների» գործելաոճը։
Արդյո՞ք փոխգնդապետ Արա Մխիթարյանի մահվան հանգամանքը կարող է հիմք հանդիսանալ քրեական գործի վերաբացման և հոդվածի վերաորակման համար, Գլխավոր դատախազությունը դեռևս չի մեկնաբանում։
Մանրամասները՝ տեսանյութում։
Ռոզա Վարդանյան
