Բայրամովը Աբդոլահիանի հետ զրույցում քննարկել է Լաչինի միջանցքի հետ կապված իրավիճակը

Իրանի ԱԳ նախարար Հոսեյն Ամիր Աբդոլլահիանը և  Ադրբեջանի ԱԳ նախարար Ջեյհուն Բայրամովը հեռախոսազրույց են ունեցել ու մտքեր փոխանակել երկկողմ համագործակցությանն ու տարածաշրջանային զարգացումներին վերաբերող հիմնական հարցերի շուրջ, գրում է Մեհր գործակալությունը։

Իրանի ԱԳՆ հաղորդմամբ՝ Աբդոլահիանը հայտարարել է, որ երկու երկրների միջև համագործակցության գործընթացը ներկայումս գտնվում է կառուցողական և դրական ուղու վրա։ Նա հաջող է որակել Իրանի և Ադրբեջանի տնտեսական համագործակցության համատեղ հանձնաժողովի ղեկավարների վերջին հանդիպումը Աստարայում՝ հավելելով, որ երկու երկրների միջև դրական պայմանավորվածություններ են ձեռք  բերվել  հատկապես երկաթուղային և ճանապարհային ոլորտում։

Բայրամովն էլ իր հերթին իրանցի գործընկերոջ վերջին այցը Բաքու նշանակալի է համարել։ Նա հավելել է, որ «այցից հետո ամենակարճ ժամկետում կարող են տեսնել դրա դրական ազդեցությունը երկկողմ հարաբերությունների վրա»։

Բայրամովը նաև Ադրբեջանի երախտագիտությունն է հայտնել «Ղարաբաղի հարցում Իրանի Իսլամական Հանրապետության կառուցողական դիրքորոշումների համար»։

Երկու կողմերը նաև ոչ կառուցողական են համարել «տարածաշրջանում օտար ուժերի ներկայությունն ու միջամտությունը»՝ միաժամանակ ընդգծելով տարածաշրջանի երկրների և դերակատարների կողմից տարածաշրջանային խնդիրների լուծման անհրաժեշտությունը։

Բայրամովը հայտարարել է, թե Արցախում  «հումանիտար իրավիճակի մասին վերջին պնդումները ոչ այլ ինչ են, քան քաղաքական շահարկումներ» ու Հայաստանին մեղադրել  սադրանքների մեջ։

Էմմա Չոբանյան