ՀՀ-ում կան դատավորներ, որոնք հանձնարարովի արդարադատություն են իրականացնում. Նիկոլ Փաշինյան․ ՏԵՍԱՆՅՈՒԹ

«Վախ չունեմ, ունեմ արդարության մեծ ձգտում ու խոր գիտակցում եմ, որ եթե մի բան անեմ կամ արել եմ, որը պետք է իմ «սրտի» կամ «ոչ սրտի դատավորների» կողմից քննության արժանանա, անպայման կարժանանա», – այսօր հրավիրված մամուլի ասուլիսի ժամանակ հայտարարեց վարչապետ Նիկոլ Փաշինյանը, անդրադառնալով հարցին, թե վախ չունի՞, որ մի օր իր «սրտի դատավորները» կկարդան հենց իր դատավճիռը:

Վարչապետը նկատեց՝ դատական համակարգում բարեփոխումների դժվար ճանապարհ ենք անցնում և մեծ հաջողություններ չեն արձանագրվում։ Միաժամանակ Փաշինյանը ԵՄ Արևելյան գործընկերության զեկույցից մեջբերում արեց, որտեղ ասվում է՝ Հայաստանը դատական ոլորտում բարեփոխումների առումով առաջատար երկիր է Արևելյան գործընկերության երկրների շարքում։

Անդրադառնալով հարցին, թե ընդդիմադիր Նիկոլ Փաշինյանը ինչպե՞ս կորակեր այն ամենը, ինչ տեղի է ունենում հիմա դատական համակարգում, վարչապետն արձագանքեց՝ ընդդիմադիր Նիկոլ Փաշինյանին թողնենք իր գործին:

«Ես հիմա էլ եմ բարձրաձայնում, որ հայաստանյան դատական համակարգում անկախության պրոբլեմ կա, և պետք է լուծել այդ պրոբլեմը:

ՀՀ Կառավարությունը դատական համակարգի անկախացման համար բարձրացնում է դատավորների աշխատավարձերը, որ նրանք սոցիալական պաշտպանվածության ավելի բարձր մակարդակ ունենան․․․

Հայաստանում դեռևս կան բազմաթիվ դատավորներ, որոնք ոչ թե ընտրովի, այլ հանձնարարովի արդարադատություն են իրականացնում․ ոչ մի սահմանափակում չունեն և ինչ որոշում ասես՝ կարող են կայացնել»,- նշեց Փաինյանը՝ հավելելով՝ ես դատական պրոցեդուրաների հետ կապ չունեմ։

Մանրամասները՝ տեսանյութում։