Ադրբեջանում կալանավորել են թերթի գլխավոր խմբագրի և գնդապետի՝ ՊՆ ղեկավար Զաքիր Հասանովի դեմ կոռուպցիոն մեղադրանքների համար

Ադրբեջանական «Hüriyət» թերթի գլխավոր խմբագիր Վուգար Մամեդովը և ՊՆ նախկին զինծառայող, պաշտոնաթող գնդապետ Էլնուր Մամեդովը վարչական կալանքի են ենթարկվել 1 ամիս ժամկետով։ Ադրբեջանի Գլխավոր դատախազության հաղորդմամբ՝ հետաքննություն է անցկացվել նշված անձանց կողմից համացանցում տեղեկատվության տարածման վերաբերյալ, որն արգելված է «Տեղեկատվության, տեղեկատվության պահպանման և պաշտպանության մասին» օրենքով։

Հայտնաբերված իրավախախտումների կապակցությամբ հարուցվել է վարույթ՝ Վարչական իրավախախտումների վերաբերյալ օրենսգրքի 388-1.1.1 հոդվածով, հավաքագրված նյութերն ուղարկվել են դատարան՝ քննարկման։ Դատարանի որոշմամբ էլ նրանք վարչական կալանքի են ենթարկվել։

Նշենք, որ պատժի պատճառը հուլիսի 19-ին Վուգար Մամեդովի հարցազրույցն է Էլնուր Մամեդովի հետ «Hüriyət TV» յութուբյան ալիքով, որտեղ նրանք սուր քննադատության են ենթարկել պաշտպանության նախարար Զաքիր Հասանովին և հայտարարել նրա լիազորությունների սահմանափակման ու ռազմական գերատեսչության ղեկավարի մոտալուտ հրաժարականի մասին։ Էլնուր Մամեդովը խոսել է ադրբեջանական բանակում առկա կոռուպցիայի մասին և մեղադրանքներ հնչեցրել Զաքիր Հասանովի հասցեին։

Հավելենք, որ 2022 թվականի հոկտեմբերին դատարանը Մամեդովին մեղավոր էր ճանաչել քրեական օրենսգրքի 147.2 հոդվածով (զրպարտություն) և նրան դատապարտել 6 ամսվա ազատազրկման։ Դատական ​​գործը բացվել է այն բանից հետո, երբ Էլնուր Մամեդովը քննադատության է ենթարկել ՊՆ ղեկավարությանը, այդ թվում՝ անձնակազմի հետ աշխատանքի գլխավոր վարչության պետ Էլչին Խալիլովին։

Վուգար և Էլնուր Մամեդովներն իրենց մեղավոր չեն ճանաչում։

Էմմա Չոբանյան