06.06.2026 | 19:42
«10 հոգի գալում ենք միտինգի». նոր գաղտնալսում ընտրակաշառքի գործով
Աղետալի իրավիճակն ավելի է սրվել, այլևս հապաղել չի կարելի․ «Կանանց աջակցման կենտրոն»-ի կոչը
Քաղաքականություն
23.07.2023 | 13:44
«Կանանց աջակցման կենտրոն» ՀԿ-ն կոչնակ է հնչեցրել Արցախում միջազգային մարդասիրական իրավունքի խախտումների վերաբերյալ՝ դիմելով Հայաստանի և Արցախի իշխանություններին, տեղական և միջազգային գործընկերներին։ Մասնավորապես․
«Արցախը կանգնած է հումանիտար աղետի շեմին։ Արդեն 224 օր շրջափակված Արցախում նորանոր չլուծվող ու ողբերգության հասցվող խնդիրներ են առաջ գալիս։ Այս աղետալի իրավիճակը էլ ավելի է սրվել վերջին վեց շաբաթվա ընթացքում։ Հատկապես, ստեղծված պայմաններում ծանր է հղի կանանց, կերակրող մայրերի, մանկահասակ երեխաների, հատուկ խնամքի կարիք ունեցող խոցելի խմբերի վիճակը։
Արցախում աճում է հղիության վաղաժամ կորստի ցուցանիշը՝ թերսնման հետևանքով, իսկ հղի կանանց մեծամասնությունն ունի սակավարյունություն՝ դեղորայքի բացակայության պատճառով։ Առողջապահական ծառայությունները լիարժեք չեն գործում, թե՛ դեղորայքի բացակայության, թե՛ վառելիքի սակավության պատճառով։ Արցախում մեծագույն խնդիդր է դարձել հիգիենայի պարագաների ձեռքբերումը, որը անմիջական ազդեցություն է ունենում հատկապես կանանց առողջության վրա։
«Կանանց աջակցման կենտրոն» ՀԿ-ն կոչնակ է հնչեցնում Արցախում միջազգային մարդասիրական իրավունքի և մարդու իրավունքների աղաղակող խախտումների վերաբերյալ, որոնք հիմնված են ազգային ատելության վրա և ունեն էթնիկ զտումներ իրականացնելու նպատակ։
Այս առնչությամբ կոչ ենք անում մեր գործընկեր տեղական ու միջազգային կազմակերպություններին, ջանքերը մեկտեղել Արցախում ստեղծված անմարդկային իրավիճակի վերաբերյալ բողոքի ձայն հնչեցնելու ուղղությամբ։ Հայաստանի և Արցախի իշխանություններին՝ պաշտոնապես դիմել ՄԱԿ-ի պարենային հիմնադրամին և աջակցություն խնդրել։ Այլևս հապաղել չի կարելի»,- նշված է կոչնակում։
