ՀԱՀ նախագահը ՄՔԴ-ից թույլտվություն է խնդրել Պուտինին չձերբակալելու համար

Հարավաֆրիկյան Հանրապետության նախագահ Սիրիլ Ռամաֆոսան Միջազգային քրեական դատարանից (ՄՔԴ) թույլտվություն է խնդրել Ռուսաստանի նախագահ Վլադիմիր Պուտինին չձերբակալելու համար, գրում է VOA-ն։

Ռամաֆոսան այս մասին հայտարարել է՝ ի պատասխան ընդդիմադիր Դեմոկրատական դաշինքի դատական հայցի, որը ներկայացվել է ընդդիմադիր «Ժողովրդական դաշինքի» կողմից՝ ստիպելու կառավարությանը ձերբակալել ՌԴ նախագահին, եթե նա ժամանաի Յոհաննեսբուրգ՝ BRICS-ի գագաթնաժողովին։ Ռամաֆոսայի խոսքով՝ Պուտինի ձերբակալությունը հավասարազոր կլինի պատերազմ հայտարարելուն, գրում է Reuters-ը:

«Հարավաֆրիկյան Հանրապետությունն ակնհայտ խնդիրներ ունի նախագահ Պուտինին ձերբակալելու և արտահանձնելու պահանջը կատարելու հարցում։ Ռուսաստանը հստակ հասկացրել է, որ իր գործող նախագահի ձերբակալությունը պատերազմի հայտարարություն կլինի»,- ասվում է Ռամաֆոսայի հայտարարության մեջ:

Նա պարզաբանել է, որ այս հարցով խորհրդակցություններ է նախաձեռնել ՄՔԴ-ի հետ, սակայն մանրամասներ հայտնել չի կարող։

Մարտին ՄՔԴ-ն Ռուսաստանի նախագահ Վլադիմիր Պուտինի ձերբակալության օրդեր է տվել՝ ուկրաինացի երեխաներին Կիևի կողմից չվերահսկվող տարածքներից Ռուսաստան անօրինական արտաքսելու կասկածանքով:

BRICS-ի գագաթնաժողովը, որին հրավիրված է Վլադիմիր Պուտինը, նախանշված է օգոստոսին։ ՀԱՀ-ն այն երկրների թվում է, որոնք ստորագրել են Հռոմի ստատուտը, որը պարտավորեցնում է կատարել ՄՔԴ-ի որոշումները և ժամանելուն պես ձերբակալել Պուտինին։

Ավելի վաղ Հարավաֆրիկյան Հանրապետության փոխնախագահ Փոլ Մաշաթիլը հայտարարել էր, որ երկրի իշխանությունները Պուտինին կոչ են անում չգալ գագաթնաժողովին։ Միաժամանակ, ըստ հարավաֆրիկյան իշխանությունների՝ Մոսկվան դեմ է արտահայտվել առաջարկին, որ գագաթնաժողովում ռուսական պատվիրակությունը գլխավորի ՌԴ ԱԳ նախարար Սերգեյ Լավրովը, իսկ Հնդկաստանը և Բրազիլիան դեմ են արտահայտվել միջոցառումը Չինաստան տեղափոխելուն։

Կրեմլն իր հերթին հայտնել է, որ Յոհաննեսբուրգում կայանալիք հանդիպմանը ՌԴ նախագահի մասնակցության ձևաչափը դեռ որոշված չէ։