11.08.2026 | 21:15
Չեմպիոնների լիգա․ «Արարատ-Արմենիայի» մեկնարկային կազմը «Ցելյեի» դեմ խաղում
Ոստիկանությունը հեռացրեց Կաթողիկոսի հրաժարականը պահանջողներին
10.07.2018 | 13:26
Այսօր առավոտյան ոստիկանությունն ազատեց Մայր Աթոռ Ս. Էջմիածնի Դիվանատան տարածքը՝ հեռացնելով այնտեղ գտնվող «Նոր Հայաստան, նոր Հայրապետ» նախաձեռնության անդամներին։
Երեկ Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը հրավիրված մամուլի ասուլիսում նշել էր, որ իրենց համար անհասկանալի է, թե ինչու ոստիկանները եկեղեցու տարածքից չեն հեռացնում ակցիայի մասնակցիներին, իսկ այսօր արդեն ոստիկաններն անցել են գործողությունների՝ նշելով, որ ակցիայի մասնակիցները խախտում են հասարակական կարգը։
Ոստիկանները նման քայլի դիմեցին նաև՝ կանխելու համար ակցիայի մասնակիցների և մյուս կողմի միջև հնարավոր բախումները։
Նշենք, որ «Նոր Հայաստան նոր Հայրապետ» նախաձեռնությունը ոստիկանության գործողությունները որակում է որպես բռնի ուժի կիրառում:
«Այսօր կարգապահական հանձնաժողովում քննարկելու են Կորյուն աբեղային կարգալույծ անելու հարցը, ուստի Մայր Աթոռի տարածքից նախաձեռնության անդամներին հեռացնելն ուներ իր նպատակը: Այն է՝ հեռու պահել շարժման մասնակիցներին, հեռացնել նրանց Մայր Աթոռի տարածքից, որպեսզի Հայր Կորյունին կարգալույծ անելուց հետո չնայեն վերջինիս աչքերին, քանի որ ոչ մի հիմք չկա նրան կարգալույծ անելու»,-ասված է նախաձեռնության տարածած հաղորդագրության մեջ:
