Դատարանը հեռացել է խորհրդակցական սենյակ՝ Վիտալի Բալասանյանին կալանավորելու միջնորդության հարցով որոշում կայացնելու

Դատարանը հեռացել է խորհրդակցական սենյակ՝ Արցախի հերոս, Արցախի Անվտանգության խորհրդի նախկին քարտուղար Վիտալի Բալասանյանին կալանավորելու միջնորդության վերաբերյալ որոշում կայացնելու, որը կհրապարակվի այսօր ժամը 19։00-ին։ Այս մասին Factor.am-ի հետ զրույցում ասաց Բալասանյանի պաշտպան Ռաֆայել Մարտիրոսյանը։

Հիշեցնենք, որ հուլիսի 13-ին խուզարկություն է իրականացվել Վիտալի Բալասանյանի Ասկերանի բնակարանում, որից հետո Բալասանյանը ձերբակալվել է։

Նրան մեղադրում են խուզարկության ժամանակ իշխանության ներկայացուցչի նկատմամբ ոչ վտանգավոր բռնություն գործադրելու սպառնալիք տալու մեջ։ Փաստաբանը բարձրաձայնել է այն մասին, որ Վիտալի Բալասանյանի մարմնի վրա վնասվածքներ են առկա։

Բալասանյանի ձերբակալման լուրի տարածումից հետո Արցախի դատախազությունը հաղորդագրություն է տարածել մի քրեական գործի մասին, որում շոշափվում է նրա որդու անունը։

«ՀՀ գլխավոր դատախազության կոռուպցիոն, սեփականության, տնտեսական գործունեության և պետական ծառայության դեմ ուղղված հանցագործությունների գործերով բաժնում քննարկվել է ԱՀ գյուղի և գյուղատնտեսության աջակցության հիմնադրամի կողմից գլխավոր դատախազություն ներկայացված հաղորդումը, որով պարզվել է, որ ԱՀ գյուղի և գյուղատնտեսության աջակցության հիմնադրամի հոգաբարձուների խորհրդի 14.06.2021թ. որոշմամբ Ասկերան քաղաքի բնակիչ Ա. Բ.-ին նպատակային փոխառության պայմանագրով տրամադրվել է 74.500.000 /յոթանասունչորս միլիոն հինգ հարյուր հազար/ ՀՀ դրամ փոխառություն՝ մեղվաընտանիքներ ձեռք բերելու նպատակով, սակայն փոխառու Ա..Բ.-ի կողմից նպատակային փոխառության պայմանագրով տրամադրված գումարը օգտագործվել է ոչ նպատակային, դրանք չեն ուղղվել պայմանագրի պարտադիր պայման հանդիսացող մեղվաընտանիքների ձեռք բերմանը, ինչի հետևանքով պետությանը պատճառվել է խոշոր վնաս։Նկատի ունենալով, որ նյութերում առերևույթ առկա են ԱՀ քրեական օրենսգրքի 199-րդ հոդվածի 1-ին մասով /Վարկը ոչ նպատակային օգտագործելը/ նախատեսված հանցագործության հատկանիշներ՝ 12.07.2023թ. հարուցվել է քրեական գործ: Գործի մինչդատական քրեական վարույթի օրինականության նկատմամբ հսկողությունը և դատավարական ղեկավարումն իրականացնում է ԱՀ գլխավոր դատախազության կոռուպցիոն, սեփականության, տնտեսական գործունեության և պետական ծառայության դեմ ուղղված հանցագործությունների գործերով բաժինը»,- հայտնել է ԱՀ դատախազությունը։

Արաքս Մամուլյան