Թուրքիայում անտառային հրդեհներ են մոլեգնում, այդ թվում՝ Աքքույու ատոմակայանի շրջակայքում․ ԼՈՒՍԱՆԿԱՐՆԵՐ

Թուրքիայում կրկին անտառային հրդեհներ են բռնկվել։ Տեղական լրատվամիջոցների հաղորդմամբ՝ 24 ժամվա ընթացքում 19 անտառային հրդեհ է բռնկվել հարավային Հաթայ և Մերսին, ինչպես նաև հյուսիս-արևմուտքում՝ Չանաքքալե նահանգներում:

Անդրադառնալով անտառային հրդեհներին՝ արդարադատության նախարար Յըլմազ Թունչն ասել է, որ հրդեհներից 16-ը մեկուսացվել են։ Նա նաև տեղեկացրել է անցյալ շաբաթվա ընթացքում հրդեհների հետաքննության վերաբերյալ՝ հայտնելով, որ բացահայտված 17 կասկածյալներից երկուսը բերման են ենթարկվել։ Նախարարն ասել է, որ հետաքննությունը վերաբերում է հուլիսի 10-19-ը ընկած ժամանակահատվածում բռնկված ինը անտառային հրդեհների:

Չանաքքալեի Քըզըլքեչիլի գյուղում անտառային հրդեհը, որը սկսվել էր խոտածածկի տարածքից, երկու առանձին վայրերում այժմ տարածվել է հարևան Քեմել և Յուկարի Օքչուլար գյուղերում։ Հրդեհը մեկուսացնելու աշխատանքները շարունակվում են։

Հաթայի Բելեն շրջանում հրդեհը շարունակում է մոլեգնել, որը, ըստ տեղեկությունների, բռնկվել է երկու անձի անփութության հետևանքով, որոնք մաքրել են իրենց այգու եղեգնուտները: Ուժեղ քամին նպաստել է հրդեհի արագ ընդլայնմանը, որը հանգեցրել է մի շարք բնակավայրերի բնակիչների տարհանմանը։

Նույն իրավիճակն է նաև Մերսինում։ Հրդեհն արագորեն սաստկացել է ուժեղ քամու պատճառով՝ վտանգ ներկայացնելով բնակելի թաղամասերի համար։ Այստեղ Գյուլնար շրջանում ևս մոլեգնում է անտառային հրդեհը, որը փորձում են վերահսկել օդից և ցամաքից միջամտությամբ։

Հավելենք, որ Գյուլնար բնակավայրը գտնվում է Թուրքիայի առաջին՝ «Աքքույու» ատոմակայանի շինհրապարակից մոտ 40 կիլոմետր հեռավորության վրա։ Այն կառուցում է ռուսական «Ռոսատոմը»։

Էմմա Չոբանյան