Կան վարչական շրջաններ, որտեղ աղբահանության հետ կապված խնդիրներ ունենք այս պահի դրությամբ. Ավինյան․ ՏԵՍԱՆՅՈՒԹ

Երևանում առկա են աղբահանության տեխնիկայի հետ կապված խնդիրներ․ որոշ վարչական շրջաններում աղբահանության խնդիրը սրվել է։ Այս խնդրին անդրադարձ կատարվեց Երևանի քաղաքապետարանի գործակարգավարական նիստի ընթացքում։

«Մենք ունենք որոշակի խնդիրներ՝ աղբահանության տեխնիկայի հետ կապված: Կարծում եմ՝ առաջին հերթին պետք է խոսենք այդ խնդիրների մասին, նաև երևանցիներին որոշակի ժամանակացույց ասենք՝ թե որ տեխնիկան ինչ ժամկետում է լինելու, որովհետև կան վարչական շրջաններ, որտեղ աղբահանության հետ խնդիրներ ունենք այս պահի դրությամբ»,-ասաց փոխքաղաքապետ Տիգրան Ավինյանը՝ կարևորելով, որ քաղաքացիներն իմանան պատճառը:

Քաղաքապետի խորհրդական Կամո Արեյանը հաստատեց՝ որոշ վարչական շրջաններում և թաղամասերում սրվել է աղբահանության խնդիրը։ Նա ներկայացրեց 3 օր անընդմեջ իրականացրած իր շրջայցի արդյունքները՝ նշելով․ «Որոշ վարչական շրջաններում ու թաղամասերում սրվել է աղբահանության խնդիրը, խախտվել է ժամանակացույցը, կա աղբամանների գերբեռնվածություն և կուտակումներ»։

«Պատճառները տարբեր են, մտահոգությունը՝ մեկը, որ այդ հիմնարկում պետք է խստացվի տեխնիկայի մասնագիտական շահագործման նկատմամբ հսկողությունը, ամենօրյա սպասարկումը: Դա վերաբերում է նաև ձնամաքրման տեխնիկային, աղբատարներին, փոշեկուլներին»,-նշեց Արեյանը և վստահեցրեց, որ տնօրենի հետ պայմանավորվել են, որ հուլիսի 17-ից կներկայացվի յուրաքանչյուր անսարք մեքենայի վերականգնման ժամկետը, որ կարողանան լիարժեք շարժակազմով սպասարկել քաղաքը:

Ավինյանն հավելեց՝ առանձին քննարկում պետք է ունենան այդ թեմայով և պետք է մշակվի հետագա զարգացման պլան:
Փոխքաղաքապետը տեղեկացրեց նաև, որ կա 4 հավելյալ մեքենա, որոնք ճանապարհին են, Հայաստան հասնելուն պես դուրս կգան փողոցներ:

Մանրամասները՝ տեսանյութում։