«Վագները» ՌԴ-ում իրավաբանորեն գոյություն չունի․ Պուտին

«Վագներ» մասնավոր ռազմական ընկերությունն «իրավաբանորեն գոյություն չունի», քանի որ Ռուսաստանում չկա մասնավոր ռազմական կազմակերպությունների մասին օրենք։ Այս մասին «Կոմերսանտ»-ի թղթակից Անդրեյ Կոլեսնիկովին ասել է ՌԴ նախագահ Վլադիմիր Պուտինը։

«Մենք չունենք օրենք մասնավոր ռազմական կազմակերպությունների մասին, այն պարզապես գոյություն չունի։ Խմբավորումը կա, սակայն իրավաբանորեն գոյություն չունի։ Սա առանձին խնդիր է՝ կապված իրական օրինականացման հետ։ Բայց սա հարց է, որը պետք է քննարկվի Պետդումայում, կառավարությունում։ Դա հեշտ հարց չէ»,- ասել է Կրեմլի ղեկավարը՝ պատասխանելով Կոլեսնիկովի հարցին՝ արդյո՞ք «Վագներ» խումբը գոյատևելու է «որպես մարտական միավոր»։

Բացի այդ, նա նշել է, որ հունիսի 29-ին հանդիպելով ընկերության ղեկավար Եվգենի Պրիգոժինի և վարձկանների հրամանատարների հետ՝ առաջարկել է «նրանց ծառայության հետագա անցման հնարավոր տարբերակներ, ներառյալ մարտական կիրառումը»՝ «Սեդոյ» մականվամբ իրենց անմիջական հրամանատարի ղեկավարությամբ։

«Շատերը գլխով էին անում, երբ ես դա ասում էի։ Իսկ Պրիգոժինը, որը դիմացն էր նստած ու դա չէր տեսնում, լսելով՝ ասաց․ «Ո՛չ, տղաները համաձայն չեն նման որոշման հետ»»,- ասել է Պուտինը։

Այսպիսով, ՌԴ նախագահը խոստովանել է, որ Մոսկվան ավելի քան 86 միլիարդ ռուբլի է վճարել գոյություն չունեցող կառույցին՝ Պուտինի խոսքերն է մեկնաբանել «Ագենստվո․Նովոստին»։

Գործակալությունը հիշեցնում է, որ հունիսի 27-ին՝ «վագներականների» ապստամբությունից երեք օր անց, Պուտինը նրանց անվանել է մասնավոր ռազմականացված ընկերություն և ասել․ «Միայն 2022 թվականի մայիսից մինչև 2023-ի մայիսը պետությունը «Վագներ» ընկերությանը վճարել է 86 միլիարդ 262 միլիոն ռուբլի՝ դրամական աջակցության և խրախուսական վճարումների համար»:

Տաթև Ֆռանգյան