Ադրբեջանն ու Թուրքիան փորձում են Հայաստանը բաժանել երկու մասի, կտրել Իրանի ու ՀՀ-ի կապը․ Վելայաթի

Իրանի գերագույն հոգևոր առաջնորդ Այաթոլլա Ալի Խամենեիի՝ միջազգային հարցերով խորհրդական Ալի Աքբար Վելայաթին Tasnim լրտավականի հետ զրույցում անդրադարձել է տարածաշրջանում ստեղված իրավիճակին ու հայտարարել, որ Թուրքիան և Ադրբեջանը ցանկանում են Հայաստանը կիսել երկու մասի։

«Այժմ, ուկրաինական պատերազմի ֆոնին, մենք ականատես ենք լինում Թուրքիայի քաղաքականության փոփոխության մեկ այլ ոճի, որն իրեն ներկայացնում էր որպես Ռուսաստանին մոտ կանգնած։ Վերջին օրերին հաղորդվում էր, որ Թուրքիան համաձայնել է հավանություն տալ ՆԱՏՕ-ին Շվեդիայի անդամակցությանը։ Այն նաև Ուկրաինային է հանձնել «Ազով»-ի զորքերի մի մասին: Դիրքորոշումների այս փոփոխության հետ մեկտեղ՝ վերջին ամիսներին բարձրացվել է նաև Թուրքիայի՝ Ադրբեջանի Հանրապետության հետ կապված լինելու հարցը, ինչին դեմ է Իրանը։

Դրան դեմ արտահայտվողներն ասում են, որ եթե Ադրբեջանի Հանրապետության և Նախիջևանի միջև կապերի դյուրացում է լինելու, ապա հարևանների կողմից հայկական հողերի լայն տարածքի օկուպացման կարիք չկա։ Այս բոլոր հնարավորությունները, ինչպիսիք են գազի տարանցումը, էլեկտրաէներգիայի հոսքը, տարանցիկ երթուղին և այլն, կարելի է հեշտությամբ հասանելի դարձնել՝ չխախտելով Հայաստանի ինքնիշխանությունը, և սա սովորական բան է երկրների միջև։
Շատ դիտորդներ զարմացած էին, թե ինչու են Ադրբեջանի և Թուրքիայի երկու կառավարություններն այդքան պնդում հարակից կողմերի միջև լարվածության աճի հնարավորության հարցում: Աստիճանաբար իրողությունները հայտնի դարձան, և փորձագետների ըմբռնումն այն է, որ Նախիջևանն Ադրբեջանի Հանրապետությանը կապող այս ընդարձակ կապերի հիմքում ընկած է այն, որ նախ՝ Հայաստանը բաժանեն երկու մասի, երկրորդ՝ անջատեն Իրանն ու Հայաստանը՝ կտրելով կապը, որը սկիզբ է առնում Աքեմենյան և Պարթևական կայսրությունների դարաշրջանից:

Երրորդ՝ դա կսահմանափակի Իրանի կապը դրսի հետ, և այդ պահից մենք հարևան կլինենք 14 երկրի՝ 15-ի փոխարեն, և կխափանվի Իրանի Իսլամական Հանրապետության ազատ կապը Հյուսիսային Կովկասի, Ռուսաստանի և եվրոպական մայրցամաքի հետ։ Տարածաշրջանային սահմանների ցանկացած փոփոխություն երկարաժամկետ լարվածություն կառաջացնի, իսկ ամենամտահոգիչը կլինի սահմանին (տարածաշրջաններում) օտար երկրների առկայությունը»,- ասել է Ալի Աքբար Վելայաթին։

Տաթև Ֆռանգյան