13.01.2025 | 09:44
Շիրակի մարզում և Թալինի տարածաշրջանում մառախուղ է
Պատերազմի մեկնարկից ի վեր ավելի քան 200 ռուս մարզիկ փոխել է սպորտային քաղաքացիությունը
Քաղաքականություն
13.07.2023 | 22:00
Ուկրաինայում լայնամասշտաբ պատերազմի մեկնարկից ի վեր առնվազն 204 ռուս մարզիկներ փոխել կամ պատրաստվում են փոխել սպորտային քաղաքացիությունը՝ կարիերան շարունակելու համար։ Այս մասին հայտնում է «Холод»-ը, որն ուսումնասիրել է միջազգային մրցումների մասնակիցների և մարզական ֆեդերացիաների ռեգիստրների մասին տեղեկությունները, գրում է Meduza-ն։
Լրագրողների տվյալներով՝ 2022-2023 թվականներին սպորտային քաղաքացիությունը փոխած մարզիկների մեծ մասը շախմատիստներ են՝ 141 հոգի։ Մարզիկների մեծ մասը հրապարակային չի հայտնում սպորտային քաղաքացիությունը փոխելու մասին, այդ մասին հայտնում է դառնում մրցումների ժամանակ, սակայն Շախմատի միջազգային կազմակերպությունը հետևում և հրապարակում է մարզիկների՝ մի երկրի ֆեդերացիայից մյուսն անցնելու մասին տեղեկությունը։
Ռուսաստանը նաև 11-ական մարզիկի է կորցրել գեղասահքում ու ձիասպորտում, 5-ական մարզիկի՝ գեղարվեստական մարմնամարզությունում ու թենիսում, 4-ական էլ՝ ավտոսպորտում ու ֆուտբոլում։
Մարզիկների մեծ մասին, ըստ լրագրողների հաշվարկների, ընդունել է Իսրայելը․ այս երկրի դրոշի ներքո այժմ հանդես են գալիս 25 ռուսաստանցիներ։ Սերբիան ընդունել է 19 մարզիկի, Գերմանիան՝ 13, Ֆրանսիան՝ 12։
Լրատվամիջոցը նաև նշում է, որ սպորտային քաղաքացիությունը փոխած մարզիկների իրական թիվը կարող է ավելի մեծ լինել, քանի որ նրանց թվում են շատ երիտասարդներ, որոնք ոչ հայտնի սպորտաձևերում են ներկայանում։
Հիշեցնենք, որ Ուկրաինա ռուսական ներխուժման հետևանքով Ռուսաստանի և Բելառուսի մարզիկներին արգելել են մասնակցել միջազգային մրցաշարերի մեծ մասին։
Էմմա Չոբանյան
